DF oo qaaday tallaabo farxad-gelisay bahda caafimaadka MUQDISHO

[Deeq A.]

Muqdisho (Caasimada Online) – Dowladda Federaraalka Soomaaliya ayaa maanta qaaday tallaabo culus, waxayna canshuur dhaaf u saameysay isbitaallada iyo goobaha caafimaad ee ku yaalla magaalada Muqdisho, sida uu shaaciyay wasiir ku xigeenka wasaaradda maaliyadda xukuumadda Soomaaliya, Mudane Cabdiqafaar Cilmi Xaange.

Adeegyada caafimaadka, sida gurmadka deg-degga ah, bukaan socodka, bukaan jiifka, qaliimada guud, hooyada iyo dhallaanka ayaa laga dhaafay canshuuraha.

Wasiir ku xigeenka wasaaradda maaliyadda ayaa shaaca ka qaaday in tani ay ku timid dood muddo usoo dhexeysay dowladda iyo bahda caafimaadka, haatana xal laga gaaray.

“Wasaaradda Maaliyadda waxay canshuur dhaaf u sameysay adeegyada daryeelka caafimaadka, waxayna ku timid dood muddoo dheer soo socotay oo u dhexeysay wasaaradda maaliyadda iyo bahda caafimaadka” ayuu yiri Wasiir Cabdiqafaar Cilmi Xaange.

Sidoo kale wuxuu hoosta ka xariiqay in ujeedada ugu wayn ay tahay in dowladda ay qayb ka noqoto dadaallada horumarineed ee caafimaadka, si loo helo adeegyo dhammeystiran.

“Ujeedadu waxaa weeye in dowladdu ay qayb ka noqoto hormarinta iyo hagaajinta adeegga daryeelka caafimaadka, si loo helo adeeg jaban oo caafimaad” ayuu raaciyay.

Waxaa kale oo uu kusii daray “Dowladda iyo xukuumadda waxaa ka go’an wax kasta oo lagu fudueyn karo in bulshada Soomaaliyeed ay ku hesho adeegyada aas aasiga, sida waxbarashada iyo caafimaadka”.

Horay bahda caafimaadka ayaa qaylo dhaan uga muujiyay canshuurta iibka ee ay soo rogtay wasaaradda maaliyadda,taas oo dhowaan ka dhaqan gashay gudaha dalka, waxayna ku doodeen inay saameyn ku leedahay howlaha ay qabtaan, taas oo hadda laga dhaafay.