Puntland oo ka warbixisay qoys dhan oo duqeyn diyaaradeed lala beegsaday

[Deeq A.]

Buuraha Calmiskaad oo kor laga sawiray

Guddoomiyaha magaalada Qandala ee gobolka Bari, Axmed Yuusuf Maxamed (Khuurshe) ayaa markii u horraysay maanta ka warbixiyay duqeyn diyaaradeed oo fiidnimadii xalay ka dhacday degaanka Sixna ee degmada Qandala, taasi oo lagu beegsaday qoys dhan oo reer miyi ah.

Guddoomiye Axmed Khuurshe oo faahfaahin ka bixiyay dhacdadaasi ayaa sheegay in loo xaqiijiyay dhimashada afar ruux iyo dhaawaca lix kale oo dhammaantood hal qoys ah, kaddib markii fiidnimadii xalay duqeyn lala beegsaday reerkaasi oo degganaa miyiga degaanka Sixna oo ka tirsan degmada Qandala ee gobolka Bari.

“Marka kowaad waxaan halkaan uga tacsiyeynaynaa qoyskii dhibaatadu ka soo gaartay duqeyntii xalay oo la sheegay afar dhimasho ah iyo lix dhaawac ah inta aan warbixinta ku hayno, waxaan leenahay wixii dhintay ilaahay ha u naxariisto, wixii dhaawac ahna ilaahay ha u booga dhayo” ayuu yiri guddoomiyaha degmada Qandala ee gobolka Bari, Axmed Yuusuf Maxamed (Khuurshe).

Guddoomiye Khuurshe oo ay weheliyaan cutubyo ka tirsan guutada Gantaal ee ciidamada Daraawiishta Puntland ayaa sidoo kale baaq u diray shacabka deggan miyiga degaannada ku teedsan buuraha Calmiskaad ee uu ka socdo hawlgalka lagu beegsanayo kooxaha Argagixisada ah ee Daacish.

“Waxaan u sheegaynaa mar kastana ku soo celcelinaa dadka reer Qandala ee jooga meelaha dagaalladu ka socdaan ee nimankaasi Xagjirka ah ku dhuumanayaan in ay goobahaasi isaga fogaadaan oo yimaadaan tuulooyinka iyo degaannada dowladdu gacanta ku hayso, wixii maanta inagu dhacay waa nagu dhaceen balse mar danbe si aysan u soo noqon” ayuu sii raaciyay hadalkiisa guddoomiyaha Qandala.

Dhinaca kale, kama uu hadal cidda leh diyaaradaha dagaalka ee fuliyay duqeyntii lala beegsaday qoyska reer miyiga ah, balse wuxu tilmaamay in duqeymo ka dhacayaan degaannada lagu tuhmayo kooxaha Argagixisada ah ee Daacish, si loo soo afjaro.

PUNTLAND POST

The post Puntland oo ka warbixisay qoys dhan oo duqeyn diyaaradeed lala beegsaday appeared first on Puntland Post.