DENMARK oo difaaceeda xoojisay xilli ay wajaheyso duulaan uga imanaya Trump

[Deeq A.]

Copenhagen (Caasimada Online) – Denmark ayaa Isniintii shaacisay inay ku bixin doonto 14.6 bilyan oo Krone-ka Danish-ka ah ($2.05 bilyan) si ay u xoojiso joogitaankeeda ciidan ee gobolka Arctic-ga, kaddib markii uu dib u soo cusboonaaday xiisaha madaxweynaha Maraykanka, Donald Trump, uu u qabo inuu gacanta ku dhigo Greenland, oo ah dhul is-maamul hoosaad leh oo hoos yimaada Denmark.

Bishan, Trump ayaa sheegay in Greenland ay muhiimad istaraatiijiyadeed u leedahay amniga Maraykanka, isla markaana ay tahay in Denmark ay ka tanaasusho gacan ku haynta jasiiraddan muhiimka ah ee Arctic-ga.

Waxaa jirta hadal-hayn iyo cabsi ku saabsan in Trump uu awood u adeegsan karo inuu qabsado Greenland, taasi oo walaac ka abuurtay caasimadaha Yurub.

Kaddib in ka badan toban sano oo ay si aad ah hoos ugu dhigtay kharashaadka dhinaca difaaca, sannadkii hore Denmark waxay u qoondeysay 190 bilyan oo Krone-ka Danish-ka ah ($26 bilyan) ciidammadeeda muddo toban sano ah, qeyb ka mid ahna hadda waxaa loo asteeyay Arctic-ga.

Denmark, iyadoo mas’uul ka ah sugidda amniga iyo difaaca Greenland, haddana waxay leedahay awood ciidan oo kooban oo ku sugan jasiiraddan baaxadda weyn, taas oo inta badan loo arko inay tahay meel amni ahaan dalool weyn uu ka jiro.

Waqtigan xaadirka ah, awoodaha ciidan ee Denmark waxaa ka mid ah afar markab oo kormeer ah oo duug ah, diyaarad ilaalo ah oo nooceedu yahay Challenger iyo 12 kooxood oo wata eeyaha barafka lagu jiido, kuwaas oo dhamaantood loo xilsaaray inay kormeeraan dhul baaxaddiisu afar jeer ka weyn yahay dalka Faransiiska.

Miisaaniyadda cusub waxaa ka mid ah maalgelinta saddex markab oo cusub oo ciidammada badda ah oo loogu talagalay hawl-gallada Arctic-ga, taasoo laba laabaysa tirada diyaaradaha aan duuliyaha lahayn ee ilaalo foge ah ee markii hore la qorsheeyay, afarna ka dhigaysa, iyo sidoo kale in kormeerka lagu sameeyo dayax-gacmeedyada, sida uu shir jaraa’id ku sheegay Wasiirka Difaaca Denmark, Troels Lund Poulsen.

Xisbiyada siyaasadda ayaa isku raacay in miisaaniyad dheeraad ah loo qoondeeyo Arctic-ga, heshiis kaas oo la soo bandhigi doono qeybta hore ee sannadkan.

Ciidammada Maraykanka ayaa saldhig rasmi ah ku leh Xarunta Cirka ee Pituffik oo ku taal waqooyi-galbeed Greenland, goobtaas oo ah deegaan istaraatiijiyad u ah nidaamkeeda digniinta hore ee gantaalaha ballistic-ga, maadaama jidka ugu gaaban ee Yurub ka soo gala Waqooyiga Ameerika uu maro jasiiradda.