Puntland oo anarro culus dhul dhigtay ajaanibta soo galaysa deegaanadeeda

[Deeq A.]

Wasaaradda amniga  dowlad goboleedka Puntland ayaa soo saartay amarro culus oo lagula socanayo dadka ajaanibta ah ee soo galaya deegaanada maamulkaas, si looga hortago falal nabad-gelyada wax u dhimaya.

Amarrka ugu horreeya ee ay soo saartay Wasaaraddu ayaa ah inaan deegaanada Puntland cirka, Badda, iyo Berrigaba ka soo geli karin cid aan haysan oggolaanshaha dowlad goboleedkaas.

Sidoo kale Shirkadaha iyo xarumaha kala duwan ee ay u shaqeeyaan ajaaniibta ayaa lagu wargeliyay in laga doonayo in ay  shaqaalohooda ajaanibta ah ku diwaangeliyaan  muddo 72 saacadood gudahood ah.

Warka ka soo baxay wasaaradda amniga Puntland ayaa intaas ku daray in Hoteellada iyo meelaha kale ee la seexdo la farayo in ay 24 saac oo kasta hay’adaha nabad-gelyada la soo socod-siiyaan cid kasta oo ku soo biirta goobahooda.

Puntland ayaa dagaal adag oo dhan walba leh kula jirta kooxaha Daacish iyo Al-shabaab, ayadoo guluf xooggan ka wadda buuraleyda Calmiskaad ee gobolka Bari, sidoo kalena howlgallo joogto ahi ay ka socdaan magaalada Boosaaso ee xarunta gobolkaas.

Source: goobjoog.com