Xaggee Shabaab geeyaan lacagaha baadda ee ay ka qaadaan Shacabka?

[Deeq A.]

Muqdisho (Caasimada Online) – Agaasimaha guud ee wasaaradda awqaafka iyo arrimaha diinta xukuumadda Soomaaliya, Mudane Ibraahim Aadan Ibraahim (Nadaara) oo wareysi gaar ah siiyay Telefishinka Qaranka Soomaaliyeed ayaa ka hadlay arrimo xasaasi ah oo ku aadan kooxda Al-Shabaab, gaar ahaan lacagaha baadda ah ee ka qaadaan shacabka.

Nadaara oo horay uga soo goostay Al-Shabaab, hadana mas’uul dowladood ayaa bixiyay xog xasaasi ah oo ku aadan halka ay geeyaan lacagaha ay aruuriyaan Al-Shabaab ee syaabaha kala duwan looga qaado dadka shacabka iyo sidoo kale ganacsatada.

Agaasime Ibraahim Nadaara ayaa shaaca ka qaaday in lacagahan oo si xoog ah shacabka looga qaato ay si gaar ah u isticmaalayaan horjoogayaasha kooxdan iyo caruurtooda, islamarkaana aysan dib ugu soo celin dadka shacabka ah ee ku nool deegaanooda.

“Lacagaha baadda ah ay qaadaan waxaa ka faa’iideystaan, iyaga carruurtooda iyo islaamahoooda, waxaana lacagtaas xooga looga soo qaadaa shacabka,” ayuu yiri Ibraahim.

Sidoo kale wuxuu hoosta ka xariiqay in aanay jirin iskuul, waddo ama xarun dadweyne oo ay dhiseen Al-Shabaab, taasna ay caddeyneyso ujeedkooda gaarka ah.

“Lama hayo laamiyo ay dhiseen, lama hayo buundooyin, iskuullo iyo jaamacado ay dhiseen inta ay hadda sameeyaan waa inta danta u ah Shabaab uun” ayuu sii raaciyay.

Waxaa kale oo uu yiri “Waa dad dul saaran shacabka oo dhuuqaayo faa’iido ay dadkii u celinaayana aysan jirin, intaana waxaa sii dheer dhibaatada ay usii gaysanayaan shacabka”

Al-Shabaab ayaa lacagaha ugu badan ka hesho shacabka iyo ganacsatada, taas oo la sheego inay xittaa maalgeliso dagaalyahanadeeda, kuna sameysato qaraxyada ay ka fuliyo caasimada iyo magaalooyinka kale ee dalka, taas oo iyana ah dhibaato kale oo wayn