Xogta weerar qarax ku bilowday oo Al-Shabaab ay ku qaaday Masagawaa

[Deeq A.]

Masagawaa (Caasimada Online) – Faah-faahino dheeraad ah ayaa kasoo baxay weerar qarax ku bilowday iyo dagaal toos ah oo kooxda Al-Shabaab iyo ciidamada dowladda iyo dadka deegaanka oo dhinac ah ku dhex-maray magaalada Masagawaa ee gobolka Galgaduud.

Dagaalka ayaa yimid kadib markii maleeshiyaadka Al-Shabaab ay gudaha magaaladaasi ku qaadeen weerar ku bilowday gaari laga soo buuxiyay waxyaabaha qarxa kadibna waxay iska caabin xooggan kala kulmeen ciidankii ku sugnaa halkaasi.

Inkasta oo si rasmi ah loo ogeyn inta uu gaarsiisan yahay khasaaraha ka dhashay dagaalka, maadaama uu aad u xooggana ayaa waxay wararka sheegayaan inay jiraan dhimasho iyo dhaawac ka dhashay qaraxa iyo dagaalkii xigay.

Dowladda federaalka Soomaaliya ayaa dhankeeda sheegtay inay ciidamada iskaashanaya ay fashilyeen weerar gaadmo ahaa oo kooxda Al-Shabaab ku qaaday Masagawaa.

“Geesiyaasha ciidanka xoogga dalka Soomaaliyeed iyo kuwa difaaca ee ku sugan magaalada Masagaway ee gobolka Galgaduud ayaa fashiliyey weerar gaadma ah oo ay Khawaarijta soo qsadeen waxaana lagu dhuftay dharbaaxo kulul,” ayaa lagu yiri qoraalka dowladda.

Waxaa weli maqan isgaarsiinta Masagawaa iyo deegaanno kale oo hoostaga, si dhab ah looma sheegin sababta hawada ka saartay, waxaana adag in la helo xogo ka madax-bannaan dhinacyada dagaalamay si loo ogaado khasaaraha inta uu gaarsiisan yahay.

Kooxda Al-Shabaab ayaa horey dhowr jeer weeraro ku bilowday qaraxyo ugu soo qaaday magaalada Masagawaa, si ay dib ugu qabsadaan magaaladan muhiimka ah oo haatan gacanta ku hayaan ciidamada dowladda oo garabsanaya kuwa deegaanka.