Ciidamada Amniga Puntland oo toogtay nin ajnabi ah oo qarax miino ku aasayay bartamaha Boosaaso

[Deeq A.]

Ajnabigii qaraxa aasayay ee la toogtay

Ciidamada Puntland oo warbixin kooban soo saaray ayaa shaaciyay in ay xalay toogteen nin ajnabi ah oo qarax miino ku aasayay wadada weyn ee magaalada Boosaaso gaar ahaanna aagga Nakhiil.

Warbixinta oo ka soo baxday Hawlgalka Ciribtirka kooxaha Argagixisada ah ee Puntland ayaa lagu sheegay in xogta ku saabsan ninkani ajnabiga ah ee qaraxa aasayay ay soo gudbiyeen shacabka Boosaaso oo ka shakiyay sidaasina lagu fashiliyay qaraxaasi.

“Ciidanka Amniga ayaa toogtay nin miino ku aasayay wadada weyn gaar ahaan aaga Nakhiil, Kaasi oo xogtiisa shacabka ka shakiyey ay soo gudbiyeen” ayaa lagu yiri warbixinta uu soo saaray Hawlgalka Ciribtirka kooxaha Argagixisada ah ee Puntland.

Ciidamada Amniga ayaa sheegay in ninka ajnabiga ah markii uu qarxiyay miinadii uu aasayay kaddib marku ciidanka arkay islamarkaana isku dayay in uu baxsado balse markiiba ciidanku toogtay sida ku xusan warbixinta Hawlgalka Ciribtirka Argagixisada.

“HawlgalkaCiribtirkaArgagixisad(PL) Ninka oo Ajenebi ah ayaa markuu arkay in Ciidanku soo aadeen qarxiyey miinadii uu aasayay isagoo isku dayay in uu fakado , Balse markiiba Ciidanka ayaa toogtay” ayuu sii raaciyay Hawlgalku warbixintiisa.

Ciidanka ayaa heegan buuxa ugu jira adkeynta amniga magaaalada Boosaaso, waxayna uga mahadceliyeen Shacabka Boosaaso sida dhakhsaha ah ee ay usoo gudbinayaan qofkii ay ka shakiyaan”Waa baraarug Shacab iyo Dowlad heegan ah oo isku duuban, si looga hortago dhagarta Argagixisada.”

PUNTLAND POST

The post Ciidamada Amniga Puntland oo toogtay nin ajnabi ah oo qarax miino ku aasayay bartamaha Boosaaso appeared first on Puntland Post.