Sarkaal sare oo ciidanka Puntland oo qarax lala beegsaday + Khasaaraha

[Deeq A.]

Garoowe (Caasimada Online) – Faah-faahino dheeraad ah ayaa kasoo baxaya qarax lala beegsaday Taliye Fu’aad Xanaano oo kamid ah saraakiisha sare ee ciidanka difaaca maamulka Puntland.

Taliye Fu’aad iyo ciidamo uu hoggaaminayey oo howl-galo ka waday buuraha Calmiskaad ayaa lala beegsaday qaraxan oo ahaa miino, sida ay inoo xaqiijiyeen laamaha amniga Puntland.

Qaraxan oo haleelay Taliyaha iyo ciidamada uu hoggaaminayay xilli ay baacsanayeen maleeshiyaad ka tirsan Daacish oo ay ka qabsadeen saldhig ciidan ayaa wararka waxay sheegayaan inuu kasoo gaaray dhaawac culus.

Taliye Fu’aad Xanaano iyo hal askari oo ka tirsan ciidankii la socday ayaa ku dhaawacmay, kadib markii miino la kacday taliyaha iyo ciidamadu hoggaaminayay ee howl-galka dagaal ka waday buuraha Calmiskaad ee gobolka Bari.

Wararka ayaa intaasi ku daraya in taliyaha iyo ciidanka uu hoggaaminayay socdaal lug ah ku jireen markii uu qaraxa miino la kacay oo aysan wax gaadiid dagaal ah wadan, balse dowladdu weli war rasmi ah kama soo saarin sida ay wax u dhaceen.

Dagaalka Puntand iyo Daacish ayaa sii xoogeysanaya, waxaana shalay ugu dambeysay ay kooxda ciidamada maamulkaasi ku weerartay diyaarad ay kasoo buuxisay walxaha qarxa, waxaana ku dhintay ugu yaraan hal askari, halka ay ku dhaawacmeen illaa saddex kale.