FARMAAJO ma ku haftay tallaabadii u dambeysay mise?

[Deeq A.]

Muqdisho (Caasimada Online) – Madaxweynihii hore ee Soomaaliya Maxamed Cabdullaahi Farmaajo ayaa Talaadadii sii daayey farriin iskugu jirtay walaac, digniin iyo baaq, xilli dhinaca kale guddiga halka garab ah ee doorashooyinka ay shaaciyeen inay bilaabayaan diiwaan-gelinya ururro cusub.

Dastuurka Soomaaliya ayaa dhala doorashooyinka, dastuurka la boobay inuu dhali karo doorasho xalaal ah sooma saarayo caqliga caadiga ah.

Madaxweynihii hore Maxamed Cabdullaahi Farmaajo ayaa walaac xooggan ka muujiyay in madaxweyne Xasan Sheekh uu go’aansaday inuu sameysto doorasho u gaar ah oo isagu maamulanayo, taas oo dalka gelin karta kala tag iyo qalaalaso horleh.

Sharciga doorashada, sharciga xisbiyada iyo dhismaha guddiga doorashada waxay dhamaan u baahan yihiin heshiis sharci ah iyo mid siyaasadeed, labadiina ma haystaan.

Haddana, guddiga halka garab ee doorashadu waxay weli ku adkeysanayaan inay noqon karaan guddi dhab oo jira oo shaqo doorashana qaban kara.

Farmaajo ayaa horey looga diiday guddi doorasho oo uu sameystay, haddana guddiga uu Xasan Sheekh sameystay uma badna inay heli karaan aqbalaad siyaasadeed iyo mid bulsho, waxayna ku dhamaan doonaan isla wadaddii uu ku dhamaaday guddigii Farmaajo sameystay ayey leeyihiin dadka ka faalloonaya arrimahan.

Maqnaashaha Puntland iyo Jubbaland iyo in aan wax talo ah laga siinin wax ka beddelka dastuurka iyo geediga doorashada ayaa ku sawireysa sida ay laandheer uga sii dhacayaan midnimada dalka iyo wadajirka umadda.

Farmaajo mar uu qodobkan ka hadlayay waxa uu sheegay in madaxweyne Xasan Sheekh tiisa gaarka ah ka doortay isku haynta dalka.

Nuxurka farriinta Farmaajo waxay aheyd in marka hore dastuurka la isla ogolaado, dhinacyada maqan la doono, doorashaduna noqoto mid loo dhan yahay oo uusan hal qof laheyn.

Madaxweynihii hore Maxamed Cabdullaahi Farmaajo si gaar ugama hadlin nuuc doorasho, laakiin wuxuu soo jeediyay in loo baahan yahay wadatashi qaran oo ay qeyb ka yihiin maamulada, baarlamaanka iyo madaxdii hore ee qaranka.

Farrintiisu waxay u muuqatay mid waaqaca la socota, waxayna kabtay hadal uu dhawaan soo jeediyay madaxweynihii hore Shariif Sheekh Axmed, kaas oo sheegay in aan Muqdisho laga qaban karin doorasho hal dhinac ah.

Madaxweyne Xasan Sheekh Maxamuud ayaa dhinaciisa weli laga soo warinayaa inuu aaminsan yahay in guddigiisa gaarka ah ee doorashadu ay keeni karaan xisaab fudud oo kusii haysan karo kursiga Villa Somalia, isagoo qiimaheeda oo gacan ka hadal hubeysan noqon kara hadda u diyaarsanaya hub iyo maleeshiyaad gaar ah