DAACISH oo xeelad laba ujeedo leh u adeegsaneysa dagaalka Puntland ku qaaday

[Deeq A.]

Boosaaso (Caasimada Online) – Maamulka Puntland ayaa horraantii sanadkaan bilaabay dagaal culus oo ka dhan ah kooxda Daacish oo saldhigooda u weyn uu yahay buuraha gobolka Bari.

Tan iyo markii uu dagaalkan bilowday waxay kooxda la timid istaraatiijiyad u muuqata inay hore u adeegsatay kooxda Al-Shabaab, xilligii dagaalkii uu madaxweyne Xasan Sheekh ku qaaday 2022-2023.

Istaraatiijiyaddan ayaa ah in aan dagaal toos ah la’la gelin ciidanka dowladda oo looga baxo hadba goob, taas beddelkeeda in ciidanka miino dhulka loo geliyo, drone lagu weeraro, la marin habaabiyo, kolba doc iyo dib loo weeraro iyo iska daba wareeg.

Istaraatiijiyadda noocaan ah ayaa badana dhasha laba ujeedo sida ay Caasimada Online ku ogaatay baaris amni oo sameysay, taas oo kooxda Daacish istustay inay u leedahay faa’iido, kuwaas oo kala ah;

1. Inay khasaarahooda yareeyaan, dhanka kalena, si aan la dareemayn inay u dhiig bixiyaan ciidanka.

2. Inay waqti iyo dhaqaale badan ka bixiyaan. Sida caadiga ah, jabhaddu wakhti kuma socda ee cidda wakhtiga iyo dhaqaalaha ku socda waa dowladda.

Sidaas awgeed, mar walba oo dagaalku daba dheeraadu waxay dhib iyo dhiigbax ku tahay dowladda. Waana sababta ay iska daba wareegga u wado kooxda Daacish.

Khubarada amniga ayaa ku talinaya in howl-galka ka dhanka ah Daacish oo haatan dardar ku socdo lagu kabo istaraatiijiyad miro looga keeni karo dagaalka, si kooxda xiniinta looga taabto.

Kooxaha argagixisada ee Al-Shabaab iyo Daacish ayaa waxay dhibaato weyn ku yihiin dowladnimada Soomaaliya, kuwaas oo dib u dhac weyn ku keenay dalkeenna, waxaana la gudboon cid walba inay u istaagto sidii dalka looga suulin lahaa, iyadoo marka hore dowladdu daacad ka noqoneyso dagaalkooda.