Magacyada shaqsiyaadka miisaanka leh ee Xamaas rabto in lasii daayo

[Deeq A.]

Gaza (Caasimada Online) – Tan iyo markii uu hirgelay heshiiska xabbad-joojinta Gaza, waxaa biloeday sii daynta la-haystayaasha Israa’iil iyo maxaabiista Falastiiniyiinta ah.

Iyadoo loo kala qeybinayo dhowr weji laga soo bilaabo Axadii toddobaadkan waxay warbaahinta Israa’iil daaha ka qaaday shakhsiyaad miisaan leh oo haatan u xiran Israa’iil, kuwaas oo Xamaas dalbanayso in la sii daayo inta lagu jiro wejiyada labaad iyo saddexaad ee heshiiska.

Shakhsiyaadka miisaanka leh ee aan la sii deyn doonin wejiga koowaad, balse Xamaas ay ku adkaysanayso inay guul ka gaari doonto sii-dayntooda wejiyada soo socda, sida uu baahiyay Kanalka 12 ee Israa’iil waxaa ka mid ah;

1- Cabbaas Al-Sayyid: Waa hogaamiye ka tirsan garabka militariga ee Xamaas, wuxuuna qorshaheeda lahaa qarax ka dhacay hoteelka Park ee magaalada Netanya habeenka ciidda Fasaxa Yuhuudda 2002, kaas oo sababay dilka 30 qof iyo dhaawaca 140 kale, waana weerarkii ugu dhimashada badnaa ee ay Falastiiniyiintu fuliyaan intii lagu jiray Intifaadii 2, sida ay sheegtay warbaahinta Israa’iil. Wuxuuna ku xukuman yahay 35 xabsi daa’in ah.

2- Ibraahim Haamid: Wuxuu ahaa hogaamiyaha garabka militari ee Xamaas ee Daanta Galbeed ee la haysto, wuxuuna mas’uul ka ahaa weeraro badan. Waxayna Israa’iil ku xukuntay dilka 46 Israa’iiliyiin ah iyo 54 xukun xabsi daa’in.

3- Cabdalla Gaaliib Al-Barghouti: Sidoo kalena loo yaqaano Injineerka Xamaas, waa maxbuuska leh xukunka ugu sarreeya ee adduunka, iyadoo loo xukumay 67 xukun xabsi daa’in, wuxuuna ka tirsan yahay hoggaanka Xamaas, waana injineer iyo khabiir ku takhasusay sameynta waxyaabaha qarxa.

4- Xasan Salaama: Wuxuu ku biiray dagaalka Israa’iil tan iyo markii uu ahaa dhallinyaro, waxaana la xiray marar badan intii lagu jiray Intifaadii 1. Ninkan ayey Israa’iil xirtay dhowr jeer oo kala duwan, iyadoo ugu dambeyntii ku xukuntay 48 xabsi daa’in ah.

Sii-deynta maxaabiistaan ayaa loo wareejiyay wada-hadallada wejiga labaad, waxaana lagu wadaa in la falanqeeyo arrimaha la-haystayaasha Israa’iil ee ay ka midka yihiin askarta, saraakiisha iyo ragga rayidka ah.

Halka Xamaas ay dalban doonto tanaasul badan oo dhqanka sii-daynta ragga ka xiran ah, sida ay baahisay warbaahinta Kan ee Israa’iil.

Wejiga koowaad ee heshiiska Xabbad-joojinta ayey Israa’iil kusii deyn doontaa sida la qorsheynayo illaa 735 maxbuus oo Falastiini ah, halka ay Xamaas uga beddelanayso illaa 33 qof oo la haystayaal Israa’iiliyiin ah.wq