Jubaland oo soo bandhigtay gaadiid siday ‘Hilibka Geriga’ iyo rag ku howlanaa arrin halis ah

[Deeq A.]

Dhoobley (Caasimada Online) – Booliska degmada Dhoobley ee gobolka Jubbada Hoose ayaa soo xiray labo nin, kuna raad jooga mid kale kadib markii lagu soo qabtay iyagoo ugaarsanaya, kana ganacsanaya hilibka Geriga.

Dadka ku nool gobolka Jubbada Hoose ayaa la sheegay inay aad u xiiseeyaan Hilibka Geriga, taasi oo keentay in rag badan ay ka ganacsadaan.

Dilka ugaarta ayaa mamnuuc ka ah Soomaaliya, balse sanadihii dowlad la’aanta iyo dagaallada ay ka jireen dalka ayuu dib u bilowday.

Sharciga lagu mamnuucay ka ganacsiga iyo dilka ugaarta ayaa weli ka jira dalka, balse ma jirto cid dhaqan gelisa, maadaama aysan dowladdu u xil saarin hay’ad gaar ah.

Taliyaha booliska degmada Dhoobley G/Sare Maxamed Haybe Muxumad ayaa TV-ga Jubbaland u sheegay in rag ku eedeysan toogashada iyo ka ganacsiga ugaarta la soo xiray.

Sidoo kale Taliyaha ayaa sheegay in rag kale oo lagu ogaaday kiiskaan ay boolisku ku raad-joogaan.

Taliyaha Booliska Dhoobley ayaa digniin u diray cid kasta ee lug yeelata waxyeeleynta deegaanka, maadaama aagga Dhoobley ay ugaartu ku badan tahay.

“Ciidamada boolisku way shaqeeyeen aad bay arintaas uga soo horjeedaan, wayna dadaaleen, waxa lagu soo helay xoolahaas si dayday ah, magaalada ayaa la rabay in la soo galiyo, waynu ogaanay kabacdina waa ka hortagnay oo hawlgal baan ka sameynay, waa ku guuleysanay,” ayuu yiri Taliyaha Booliska Degmada Dhoobley.

Labada nin ee lasoo qabtay waxaa wehliya seddax kamid ah gaadiidkii ay ragaasi ku ugaarsa jireen, sida uu sheegay Taliyaha Booliska Dhoobley.

“Mid baxsaday maahane, labo nin iyo seddax gaari oo Hilibkii Geriga uu saaran yahay ayaan soo qabanay,” ayuu hadalkiisa ku sii daray Taliye Maxamed Haybe.

Ugaar badan ayaa u yaacday gudaha dalalka deriska la ah Soomaaliya, kadib markii ay ku nabadgali waayeen gudaha dalka.

Sidoo kale, markii kala dambeyntu meesha ka baxday dadka Soomaaliyeed ayaa bilaabay inay dhirta jaraan, taas oo ka qeyb qaadatay in ugaarto isaga cararto Soomaaliya, intii dalka ku hartana weli waa la ugaarsadaa.