Sawirro: Asad Diyaano oo si cajiib ah u abaal-mariyey askarigii uu feeray Xildhibaan Xasan Firinbi

[Deeq A.]

Muqdisho (Caasimada Online) – Taliyaha Ciidanka Booliiska Soomaaliyeed Sarreeye Guuto Asad Cismaan Cabdullaahi (Asad Diyaano) ayaa u xiray darajada Labo-Xidigle Xuseen Maxamed Xasan oo ahaa Askari kulankii ugu dambeeyey ee Baarlamaanka lagu dhex-feeray.

Askariga maanta la dalacsiiyey ayaa waxaa si ku talagal ah u feeray Xildhibaan Xasan Firinbi oo ka tirsan Golaha Shacabka.

Falkaas ayaa ka dhacay gudaha hoolka Villa Hargeysa, xili lagu gudaha jiray kulankii ugu dambeeyey ee labada aqal ee baarlamaanka 27-kii November ee sanadkii tagey.

Taliska Booliska ayaa sheegay in askarigaan dallacsiinta uu ku mutaystay akhlaaqdii uu muujiyey, markii uu xildhibaanku u gacan qaaday.

Warbaahinta ayaa toos looga daawanayey xildhibaanka oo askariga feeraya iyo askariga oo is xakameynaya gacmahana gadaal marsaday.

Sidoo kale qoraalka booliska waxaa lagu cadeeyey in askarigaan ay madaxda qaranka cajab gelisay sidii uu waajibaadkii askarnimo ee saarnaana u gutay, isagoo weliba dhaawac ah.

Sanka ayuu dhaawac culus ka soo gaaray askariga, waxaana la dhigay isbitaalka Madiina, halkaas oo Taliyaha Booliska iyo madax kale ay ku booqdeen.

Xildhibaan Xasan Firinbi ayaa falkii uu u geystay askarigaan kala kulmay dhaleeceyn aan caadi aheyn, wuxuuna ugu dambeyntii bixiyey raali gelin.

Sidoo kale, Guddoomiyaha Golaha Shacabka ayaa Xildhibaan Xasan Firinbi ka ganaaxay kulamada baarlamaanka, muddo labo bilood ah, taasi oo ah ganaax uu ku muteystay gacan qaadkii uu ku sameeyey askariga.