Maxamed Bin Salmaan oo sameeyey ballan-qaadkii ugu cuslaa kadib la-hadalka Trump

[Deeq A.]

Riyadh (Caasimada Online) – Dhaxal-sugaha Boqortooyada Sacuudiga Maxamed Bin Salmaan ayaa ugu hambalyeeyay Donald Trump ku soo laabashadiisa Aqalka Cad, isaga oo taleefon ay ku wada-hadleen Khamiista maanta ah ku ballan-qaaday in Boqortooyada ay ballaarin doonto maalgashiga iyo ganacsiga ay la leedahay Mareykanka.

Hogaamiyaha aan rasmiga aheyn ee Sacuudi Carabiya ayaa hambalyo ka timid aabihiis, Boqor Salmaan u gudbiyey Trump, intii lagu jiray wada-hadalka, sida lagu sheegay bayaan ka soo baxay wasaaradda arrimaha dibadda.

Dhaxal sugaha ayaa intaas ku daray in boqortooyadu “ay ballaarin doonto maal-gashigeeda iyo ganacsigeeda Maraykanka, oo ay gaarsiin doonto ilaa 600 bilyan oo dollar muddo afar sano ah, lagana yaabo intaas ka badan”.

Dhinaca kale, wada-hadallo taleefoon oo isna uu la yeeshay dhaxal-sugaha, ayaa xoghayaha cusub ee Arrimaha Dibadda ee Mareykanka Marco Rubio wuxuu kala hadlay arrimaha Suuriya, Lubnaan, Gaza iyo “khatarta ka imaaneysa Iran iyo kuwa raacsan”, sida lagu sheegay bayaan.

“Waxay sidoo kale ka wada hadleen faa’iidooyinka iskaashiga dhaqaale ee Maraykanka iyo Sucuudiga iyo fursadaha ay ku kobcin karaan dhaqaalahooda dhinacyo kala duwan oo ay ka mid tahay AI,” ayuu yiri afhayeenka Rubio.

Intii lagu jiray maamulkiisii ugu horreeyay, Trump wuxuu si firfircoon ula macaamilay Sacuudi Carabiya, oo muddo dheer Washington u aheyd saaxiib tamar iyo ammaan.

Booqashadii ugu horeysay ee uu dibadda ku tago sanadkii 2017-kii waxa ay aheyd caasimadda Sacuudiga ee Riyaad, halkaas oo loogu sameeyay soo dhaweyn ballaaran oo ay ka mid tahay qoob-ka-ciyaarka seefta iyo duulista diyaaradaha dagaalka.

Xiriirka ayaa markii dambe qaboobay iyadoo Amiir Maxamed uu ku eedeeyey Trump inuu ku guuldarreystay inuu si degdeg ah uga jawaabo ka dib markii 2019-kii weerar si weyn loogu eedeeyay Iran uu kala bar ka dhigay wax soo saarkii saliidda ceeriin ee Boqortooyada.

Riyaad iyo kooxda Trump si kastaba ha ahaatee waxay isku dayeen inay xoojiyaan xiriirka ka dib markii uu ka tagay Aqalka Cad, gaar ahaan iyada oo loo marayo maalgashi iyo heshiisyo dhismo oo lala galay shirkadda gaarka uu u leeyahay ee Trump Organization.

Jared Kushner, oo ah wiilka uu soddogga u yahay Trump, ayaa sidoo kale difaacay in uu Sacuudiga ka helay maalgashi uu ku sameeyey shirkaddiisa gaarka ah, taasoo lagu sheegay 2 bilyan oo dollar.

Laakin xiriirka maamulkii Biden ayaa si weyn u soo hagaagay, waxayna labada dhinac isku dayeen in ay ka wada xaajoodaan waxa loogu yeero heshiis weyn kaas oo Sacuudigu uu ku aqoonsanayo Israa’iil si uu ugu beddasho heshiis difaac ah oo uu la galo Mareykanka iyo in laga caawiyo barnaamijka Nukliyeerka rayidka.

Heshiiskaas ayaa hakad galay ka dib markii Xamaas ay weerartay Israa’iil October 7, 2023, taasi oo horseeday dagaalka ka qarxay Marinka Gaza.