Ku dhowaad 100 Falastiiniyiin ah oo laga soo daayay Xabsiyada Israa’iil

[Deeq A.]

Ayadoo uu saacado ka hor si rasmi ah u dhaqan-galay heshiiskii xabbad-joojinta Qasa ayaa xabsiyada Israa’iil laga soo daayay 90 qof oo Falastiiniyiin ah, waxayna dib ula midoobeen qoyaskooda.

90-kan maxbuus ayay Israa’iil ku badelay 3 qof oo kamid ah dadkii Xamaas ay ku haysatay marinka, kuwaas oo ayaguna saacado ka hor gaaray gudaha Israa’iil, ayadoo ay maxaabiista kala gudbinayso hay’adda Laanqayrta Cas.

Inta badan falastiiniyiinta xabsiyada laga soo daayay ayaa gaaray magaalada Ramallah, halkaas oo ay ku soo dhaweeyeen kumanaan qof, balse ciidamada Israa’iil ee aaggaas jooga ayaa dadka uga digey inaan la samayn karin dabaaldegyo waaweyn.

Heshiiskan ay gaareen Israa’iil iyo Xamaas oo ku soo beegmaya 15 bilood oo dagaal lagu hoobtay ah, ayaa waxaa ka shaqeeyay dalalka Mareykanka, Masar, iyo Qatar, waxaana la filayaa inuu horseed u noqan doono xal siyaasadeed oo laga gaaro xiisad aan dhammaan ee Israa’iil iyo falastiin.

Source: goobjoog.com