Bajaajleyda Muqdisho oo lagu soo rogay amar laga qariyey shacabka – Muxuu yahay?

[Deeq A.]

Muqdisho (Caasimada Online) – Dowladda Federaalka ah ee Soomaaliya ayaa amar cusub oo aan horay loo sii shaacin kusoo rogtay darawallada Bajaajleyda, kaas oo isla maanta ka dhaqan-galay magaalada Muqdisho ee caasimada Soomaaliya.

Amarka lagu soo rogay Bajaajta ayaa la xiriira sameecadaha gadaal ka saaran mootooyinka oo dhammaan maanta laga dajiyay, sida ay sheegeen qaar kamid ah Bajaajleyda.

Sida ay ogaatay Caasimada Online, amarkan ayaa waxaa soo rogay laamaha amniga, iyada oo sababta lagu sheegay inay ka qayb-qaadan karaa nabad-gelyo darrada, waxna lagu soo dhex qarin karo.

Mid kamid ah dhalinyarada ku shaqeysta Bajaajta oo la hadlay Telefishina Soomaali Cable ayaa ka horyimid go’aanka dowladda, wuxuuna sheegay inuu caqabad ku yahay shaqadooda.

Waxaa kale oo uu tilmaamay in aan horay loola wadaagin amarkan, kaliyana ay ka war heleen, iyaga oo laga dajinayo sameecadaha waa wayn ee gadaal u saaran.

“Dhalinyarada mooto sameecad la’aan ah maba raacaan, marka mooto aan sameecad saarneen cid raaceyso maleh. laamaha ammaanka waxaan dhihi lahaa haka laabtaan go’aankaasi” ayuu yiri mid kamid ah Bajaajleyda ku sugan magaalada Muqdisho.

Sidoo kale wuxuu sii raaciyay “Annaga oo is maal-gelinay waa ku baxsan la’nahay magaaladeenna mootadaan aad u jeedo waxaan kala soo bixiyay 4,400 oo dollar”.

Muqdisho ayaa waxaa ka howlgala gaadiidka Bajaajta oo aad u badan, kaas oo shaqo abuur u noqday dhalinyaro badan, waxaase sii kordhaya caqabadaha ay haatan la kulmayaan.