Labo garsoore oo maanta lagu dhex toogtay maxkamadda ugu sareysa…

[Deeq A.]

Tehran (Caasimada Online) – Sida ay ku warantay warbaahinta dowladda Iran, waxaa maanta gudaha maxkamadda sare ee dalkaas lagu dhex toogtay labo garsoore oo sare, kuwaas oo muhiim u ahaa dowladda Iran.

Bogga garsoorka Iran (Mizan), ayaa lagu shaaciyey in garsooreyaashii kala ahaa Ali Razini iyo Mohammad Moghiseh la dilay, kadib markii nin hubeysan uu maanta gudaha u galay maxkamadda.

Waa Maxkamadda ugu sareysa dalka Iran, waxayna ku taallaa caasimadda dalkaas ee Tehran.

Kuwa weerarka soo qaaday ayaa la sheegay inay is dileen, kadib markii ay howlgalka fuliyeen, isla markaana xaqiijiyeen in aysan baxsa karin.

Mid kamid ah ilaaladii garsoorayaasha la dilay ayaa sidoo kale la sheegay inuu weerarka ku dhaawacmay.

Si rasmi ah looma oga ujeeddada ka dambeysa weerarkaas, balse labada garsoore ayaa la sheegay inay door ka ciyaareen xukunka iyo dilka dadkii reer Iran ee kasoo horjeeday taliska Islaamiga ah ee dalkaas ka jira.

Waxay shaqadaan soo bilaabeen sanadihii 1980-kii iyo 1990-kii, mid ka mid ah garsooreyaasha, Razini, ayaa isku day dil ka badbaaday sanadkii 1998-kii.

Midka kale, Moghiseh, Mareykanka ayaa cunaqabateyn kusoo rogay sanadkii 2019-kii.

Moghiseh wuxuu sidoo kale ka mid ahaa 7 garsoore oo reer Iran ah oo dowladda Canada ay cunaqabateyn kusoo rogtay sanadkii 2023-kii, sababo la xiriira doorkooda tacaddiga xuquuqda aadanaha ee Iran ay ka wadaan.

Dalka Iiraan waxaa lagu maamulaa xukun adag oo shuuci ah, waxaana sanad kasta la daldalaa boqolaal qof oo ku eedeysan inay ka soo horjeesteen xukunka rajiimka heysta Iran.

Hoos ka eeg sawirka garsoorayaasha weerarka lagu toogtay