Wax lama filaan ah oo loogu tegay goobihii dagaalka looga qabsaday Daacish

[Deeq A.]

Boosaaso (Caasimada Online) – Maamulka Puntland oo haatan dagaal culus kula jirta kooxda Daacish ayaa sheegay inuu ka sameeyay horumar ballaaran.

Maamulka ayaa shaaciyay in Daacish laga saaray 60% goobihi ay ka haysteen dhulka buuraleyda, kadib dagaal qaraar oo lala galay kooxda.

Saraakiisha Puntland ayaa dhankooda xaqiijiyay qabsashada goobo muhiim ah oo Daacish ku sugneyd, kuwaasi oo loogu tagat waxyaabo lama filaan ah.

Saraakiisha ayaa maalmihii u dambeeyay waxay faafinayeen sawiro ay sheegeen in ay yihiin goobo ay la wareegeen oo Daacish laga qabsaday, kuwaas oo laga arkayey diyaarado nooca aan duuliyaha lahayn oo xajmi ahaanna aan wayneyn, kana mid ah waxyaabo ay ciidamadu soo bandhigeen.

Godadka ayay saraakiishu sheegeen inay ahaayeen kuwa aad u waaweyn, islamarkana si wanaagsan looga shaqeeyay.

Tan ayaa lama filaan ku noqotay, maadaama godadkan qaarkood ee Daacish qodatay ahaayeen dabaqyo is dul-saaran, sida uu sheegay wasiirka warfaafinta ee Puntland Maxamuud Ceydiid Dirir.

“Runtii lama filaan ayay ahayd waayo god yar oo la yaqaano oo xaraar daanyeer ahayd in la sii qodo oo saddex dabaq laga dhigo oo doonyo raashiin ah lagu keydiyo oo qasaalado la dhigto oo biyihii iyo shaawaradii lagu sameysto gudaheeda oo qasaaladihii dharka lagu dhaqanayay gudaheeda la dhigto oo daro-niskii la dhigto iyo qaraxyadii gudaheeda lagu keydsado waxay ahayd wax la yaab leh oo anan la filayn,” ayuu yiri wasiirka.

Goobaha illaa haatan ay qabsadeen ciidamada Puntland ayaa waxaa kamid ah Dib-qalooc, Ceel-ileed, Haadi-xanaan, Al-dacwah, sidoo kalena waxaa ku jira dugsigii tababarka oo ahaa kii u weynaa ee ku tababari jireen dagaal-yahaanada.