Ra’iisul Wasaare Xamsa”Dowladda Federaalka waxa ay si buuxda u garab taagan tahay Ciidamada geesiyaasha ah ee Puntland’

[Deeq A.]

Ra’iisul Wasaare Xamsa Cabdi Barre ayaa Hambalyo u Diray Ciidamada Puntland ee Ka Hortagaya Daacishta ku sugan buuraha gobolka Bari.

Ra’iisul Wasaaraha Soomaaliya, Mudane Xamsa Cabdi Barre, ayaa boggaadiyay guulaha muhiimka ah ee ay Ciidamada Puntland ka gaareen dagaalka lagula jiro kooxaha argagixisada, gaar ahaan kooxda Daacish.

Ra’iisul Wasaaraha ayaa sheegay in Dowladda Federaalka Soomaaliya ay si buuxda ugu garab taagan tahay ciidamada geesiyaasha ah ee Puntland, kuwaas oo si naf hurnimo leh uga shaqeynaya badbaadinta shacabka iyo difaaca amniga dalka.

“Dowladda Federaalka waxa ay si buuxda u garab taagan tahay Ciidamada geesiyaasha ah ee Puntland ee dagaalka kula jira Cadowga Daacish. Waxaanan ugu hambalyeynayaa guulaha waaweyn ee ay ka soo hooyeen dagaalka cadowga,” ayuu yiri Ra’iisul Wasaare Xamsa Cabdi Barre.

Sidoo kale, Ra’iisul Wasaaruhu waxa uu ku boorriyay ciidamada inay sii wadaan dadaalkooda, iyagoo isku duubni iyo geesinimo muujinaya. Waxa uu sidoo kale ku baaqay in la xoojiyo iskaashiga dowladda dhexe iyo dowlad-goboleedyada si argagixisada looga cirib tiro guud ahaan dalka.

Source: goobjoog.com