Goormee Axmed Madoobe furi doona xujada safarada ee hor-taalla kadib markii DF ay…

[Deeq A.]

Muqdisho (Caasimada Online) – 27-kii bishii November ee sanadkii dhamaaday dowladda federaalka Soomaaliya ayaa soo saartay waaran lagu soo qabanayo hoggaamiye Axmed Maxamed Islaam (Madoobe).

Ninkan ayey dowladda ku eedeysay u adeegida dowladda shisheeye iyo inuu ka horyimid dastuurka dalka iyo guud ahaan dowladnimada Soomaaliya. Durba waxaa soo baxay dareen ah inay arrintani socdaal ahaan u saameyn doonto Axmed Madoobe.

Mudaddaas illaa maanta Axmed Madoobe kama bixin magaalada Kismaayo. Illaa xilligaas dhinaca dowladda federaalka Soomaaliya waxay sheegayaan in uusan Axmed Madoobe u dhoofi karin dibadda.

Axmed Madoobe ayaa inta badan aadi jirey waddamada Kenya iyo Imaaraadka, balse meelna uma dhaqaaqin tan iyo markii uu dib isku doortay, dowladda federaalkuna ay soo saartay waaranka.

Iyadoo Axmed Madoobe uu ku adkaaday dagaalkii milatari ee kaga yimid dhanka dowladda federaalak ah, sidoo kalena la furfuri waayey xarkihiisa Imaaraadka iyo Kenya, haddana arrinta socdaalku waa su’aal weli hortaalla Axmed.

Dhawaan waxaa soo baxay warar sheegaya inuu ku jiro qorshe safar, laakiin dhanka dowladda federaalka oo la hadalnay waxay ku goodiyeen in uusan ka bixi karin magaalada Kismaayo.

Haddii uu Kismaayo ka tago, iyadoo xiisaddan taagan tahay ma cadda inuu xaalka sidiisa ugu soo laaban doono, waana mid kale oo walaac leh ayey leeyihiin qaar ka tirsan dadka isha ku haya arrintaan.

In ciidankiisa la kala fur-furi karo ayuu ogaaday Axmed Madoobe intii uu ku jiray dagaalkan. Mowduuca socdaalka waa xujo furis uga baahan asbuucyada soo aadan, haddii kale waxaa dhab noqon doonta sheegashada dowladda federaalka Soomaaliya ee ah inuu waarankooda u xayiran yahay Axmed Madoobe.