Kalluumeysato ku luntay badda Soomaaliya oo laga helay dal kale

[Deeq A.]

Jabuuti (Caasimada Online) – Kalluumeysato Soomaaliyeed oo muddo bil ka badan lagu la’aa xeebaha Somaliland ayaa iyagoo bad-qaba hadda laga helay xeebaha dalka Jamhuuriyadda Jabuuti.

Ciidaanka ilaalada xeebaha dalka Djibouti oo ku guda jira howlahooda ilaalinta xeebaha ayaa soo samata-bixiyay saddex kalluumaysato oo bil ka hor ka soo shiraacday magaalada Berbera.

Kalluumaysatadaan ayaa sheegay in cilad weyn ay ku timid matoorka Doontii ay wateen, kadibna ay xakamey waayeen Doonta oo hadba dhinac la aadeysay.

Markii la wareystay waxay sheegeen in Beterigii uu ka dhacay, sidaasna ay muddo bil ka badan ku dul sabeynayeen badda.

Saraakiisha ciidamada ilaalada xeebaha Jabuuti ayaa sheegay in ay hadda ka caawinayaan kalluumaysatadaan in ay ku laabtaan deegaannadii ay markii hore ka yimaadeen ee gudaha Somaliland.

Saddexdaan nin ayaa sheegay in xaaladoodu ay fiican tahay, isla markaana ay ciidamadu si wanaagsan u soo dhaweeyeen oo u gacan siiyeen, haddana ay dib ugu laabanayaan halkii ay markii hore ka yimaadeen ee waqooyiga Soomaaliya.

Xeebaha Soomaaliya oo inta badan aan ilaalo laheyn ayaa waxaa u kalluumeysi taga dhallinyaro Soomaaliyeed, kuwaas oo la kulma cabado badan oo qaarkood ay ka soo daran yihiin waxa ku dhacay raggaan.