Puntland oo baaq ka soo saartay dhaq dhaqaaqa kooxaha Daacish ee ka baxsanaya Hawlgalka Calmiska

[Deeq A.]

Dowladda Puntland ayaa guud ahaan dadweynaha ugu baaqday in ay soo gudbiyaan xogta ku saabsan dhaq dhaqaaqa kooxaha argagixisada ah ee ka firxanaya hawlgalka Calmiska.

Taliyaha Qeybta Booliska Gobolka Karkaar G/sare Xuseen Cali Maxamuud oo hadal kooban jeediyay ayaa dhammaan dadweynaha ugu baaqay in ay taxaddar dheeri ah ka muujiyaan dhaq dhaqaaqa firxadka argagixisada ka baxsanaya hawlgalka buuraleyda gobolka Bari.

G/sare Xuseen Cali Maxamuud ayaa baaqan u jeediyay shacabka ku dhaqan xeebaha iyo degaannada fog fog ee Puntland gaar ahaanna kuwa xeebaha iyo tuulooyinka gobolka Karkaar oo uu ka codsaday in ay sida ugu dhakhsaha badan u soo gudbiyaan wixii xog ah ee ku saabsan dhaq dhaqaaqyada looga shakiyo firxadka argagixisada Daacish.

Dowladda Puntland ayaa hawlgalkii ugu xooggana ku qaaday buuraleyda Calmiskaad ee gobolka Bari oo ay ku dhuumaaleystaan mileeshiyaadka kooxaha Daacish halkaasi oo ciidamadu jiho kasta ka go’doomiyeen si aysan cidna uga baxsan.

PUNTLAND POST

The post Puntland oo baaq ka soo saartay dhaq dhaqaaqa kooxaha Daacish ee ka baxsanaya Hawlgalka Calmiska appeared first on Puntland Post.