PUNTLAND oo go’aan ka gaartay ajaaniibta ku jirta Daacish

[Deeq A.]

Boosaaso (Caasimada Online) – Taliska Ciidanka Puntland Marine Police Force oo ka hadlay howlgallada ka socda gobolka Bari ayaa shaaciyay go’aan culus oo ka dhan ah kooxda Daacish oo haatan dagaal xooggan kula jirta Puntland.

Sarkaal sare oo u hadlay ciidanka PMPF ayaa ku dhowaaqay in haatan wixii ka dambeeya uunu wax cafis ah la siin doonin xubnaha ajaaniibta ee ka barbar dagaalama kooxda Daacish, kuna dhuumaaleysanaya dhulka buuraleyda ee gobolkaasi.

Waxa uu tilmaamay in ay yihiin rag soo duulay oo cadow ah, kana socda dalal shisheeye oo kala duwan, balse ay ka hortagi doonaan qorshahooda.

“Argagixisada ajaanibta ah ee ka timid dalal kala duwan looma fidin doono wax cafis ah,” ayuu yiri General Cabdiraxman oo ka tirsan saraakiisha ciidanka PMPF (Puntland Marine Police Force).

Sidoo kale wuxuu intaasi kusii daray in fursaddii ugu dambeysayay ay siiyeen xubnaha Soomaalida ah ee Daacish ka tirsan, si ay isu soo dhiibaan kahor inta aan la weerarin.

Go’aankan ayaa kuso aaday, kaddib markii dhawaan 12 xubnood oo ajaanib ah oo ka tirsan Daacish ay weerar ka geysteen deegaanka Dharjaalle ee gobolka Bari, halkaas oo uu khasaare kasoo gaaray ciidamo ka tirsan kuwa Puntland oo loo diyaariyay howlgalka.

Ciidamada Puntland ayaa hadda isku fuliyay aagga buuraha Calmiskaas, halkaas oo ay ka wadaan guluf dagaal oo ka dhan ah Daacish oo halkaas ku leh fariisimo waa wayn.