Wasiir Fiqi oo qaadaya tallaabo la xiriirta siyaasadeynta deeqaha ay hesho Soomaaliya

[Deeq A.]

Muqdisho (Caasimada Online) – Wasiirka arrimaha dibadda Soomaaliya Axmed Macalim Fiqi ayaa sheegay inay ka hortagi doonaan deeqaha bini’adaannimo ee la siyaasadeeyo.

Wasiirka ayaa shaaciyay in wasaaradda arrimaha dibadda ay qaadan doonto doorkeedii la xisaabtanka hay’addaha caalamiga ah ee deeqaha siiya Soomaaliya

Sidoo kale wuxuu si adag uga digay deeqaha la siyaasadeenayo, isagoo tilmaamay in dowladda Soomaaliya ay la socoto kuwa falalkaasi gacanta kula jira.

Warka Wasiir Fiqi ayaa ku soo aadaya iyadoo reer Puntland ay maalmahaan muujinayeen cabasho weyn oo ay ka qabaan sida dowladda federaalka ay u qeybiso deeqaha dalku helo.

Kiiskii ugu dambeeyey ee Puntland ka carootay wuxuu ahaa qaabka loo qeybiyey gaadiid Cagaf ah oo dowladda Soomaaliya ay siisay dowlad goboleedyada, qeybinta gaadiidkaas ayaa lagu bahdilay Puntland.

Wasaaradda Beeraha Soomaaliya ayaa qeybisay 26 Cagaf oo kuwa beeraha fala ah, waxaana dowlad goboleedyada loo siiyey min 5 Cagaf, halka Puntland la siiyey 2 kaliya.

Degmooyinka Balcad iyo Afgooye oo Muqdisho u dhow iyo deegaanada ku xeeran ayaa sidoo kale loo qeybiyey 4 Cagaf oo ka dheeri ah kuwa la siiyey dowlad goboleedyada ay ka kala tirsan yihiin, maadaama aad loo maal-gashaday wax soo saarkooda.

Wasiirka Warfaafinta Puntland oo warbaahinta la hadlay ayaa wax lala yaabo ku tilmaamay sida qeybinta gaadiidkaas beeraha fala loogu bahdilay Puntland oo diiday inay la shaqeyso dowladda federaalka.

Dowladda Soomaaliya ayaa sidoo kale cayimtay deegaanka la gey doono labada Cagaf oo loo qoondeeyey Puntland, horay waxaa deegaanada maamulkaas uga taagnaa cabashooyin kale oo la xiriira mashaariicda dowlad goboleedyada loogu soo dhiibo dowladda Federaalka, sida dhismaha wadooyinka.