Cabdiqaadir Muumin ma wuxuu noqday amiirka guud ee Daacish?

[Deeq A.]

Boosaaso (Caasimada Online) – Sida ay sheegeen falanqeeyayaasha arrimaha siyaasadda iyo amniga, hoggaamiyaha Soomaaliga ah ee kooxda Daacish Cabdiqaadir Muumin ayaa si aan rasmi ahayn u noqday hoggaamiyaha guud ee kooxda, inkasta oo aanu wadanin magaca rasmiga ah ee jagadaas.

Arrintan ayaa imanaysa iyada oo uu mugdi badan ku jiro haybta “Khaliifka” ama Amiirka guud ee kooxda Daacish ee Abou Xafs al-Hashimi al-Qurashi, iyada oo uu muran ka taagan yahay jiritaanka qof magacaas leh.

Khubarrada qaar ayaa tilmaamaya inay arrintaasi suurtagal ka dhigayso in Cabdiqaadir Muumin uu hadda madax u yahay xafiiska guud ee maamulka caalamiga ah ee Daacish isaga oo jooga Soomaaliya.

Haddaba, maxaan ka naqaana Cabdiqaadir Muumin?

Inta laga ogyahay Cabdiqaadir Muumin, wuxuu dhashay sanadihii kontomeeyadii, isagoo ku dhashay degmada Qandala ee gobolka bari ee Soomaaliya.

Muumin ayaa dhammaadkii sagaashameeyadii galay Yurub, xilligii dagaalada culus ka socdeen Soomaaliya, isagoo ku horreeyey dalka Sweden oo uu daganaa in door ah, balse markii danbe wuxuu u wareegay dalka Ingiriiska halkaas oo uu waayo kale ku qaatay.

Waxaa uu kamid ahaa culimadii masaajidka Quba oo ku yaala magaalada Leicester iyo xarunta islaamiga ah ee Greenwich ee London. Muumin ayaa ku biiray maxkamadihii Islaamiga ahayd ee ka dhismay koonfurta Soomaaliya sanadkii 2006-dii.

Waxaa la sheegas xilligii uu ka tirsanaa Maxaakiimta Islaamigaa uu tagay Muumin magalada Bosaaso ee gobolka Bari. Cabdiqaadir ayaa markii maxaakiimta iyo Al-Shabaab ay kala baxeen ku biiray kooxda Al-Shabaab, isaga oo joogi jiray xilligaas Xamar iyo Shabeellada Hoose.

Basle wuxuu sanadkii 2007-dii markii kooxda Al-Shabaab xubnahadooda ka aas-aasmayeen Puntland uu yimid deegaanada maamulkaasi, isagoo dhuumaalaysan jiray, markii danbana wuxuu galay buuraha isagoo ka tirsan Al-Shabaab.

Waxaa la aaminsan yahay Muumin, inuu ka soo baxsaday Ingiriiska kadb markii ay baaritaan ku samaysay haya’adda sirdoonka gudaha dalkaas ee MI5, ka dibna waxa uu ku biiray kooxda Al-Shabaab ee ka dagaalanta Soomaaliya.

Markii kooxda uu ku biiray Cabdiqaadir Muumin ayaa meel fagaare ah ku gubay baasaboorka Ingriiska oo uu haystay.

Dhammaadkii sanadkii 2015-kii ayaa la rumaysan yahay in Cabdiqaadir Muumin uu xiriir la sameeyey hogaamiyihii kooxda ISIS ee Ciraaq Abu Bakr al-Baghdadi, si uu abuuro wakiilada kooxda ee Soomaaliya.

Muuqaal ay kooxdu soo bandhigeen iyagoo ku sugan buuraha Galgala ee Puntland ayuu kasoo muuqday Cabdiqaadir Muumin sanadkii 2019-kii. Si lamida sanadihii ka dambeeyey gaar ahaan 2022-kii ayay kooxdu sii dayeen tiro ka tirsan ciidamadooda oo tababar ku qaadanaya buuraha bari ee Puntland.