DF oo shaacisay khasaaraha duqeyn culus oo ka dhacday aagga Kismaayo

[Deeq A.]

Kismaayo (Caasimada Online) – Dowladda federaalka Soomaaliya ayaa faah-faahin dheeraad ah kasoo saartay duqeyn culus oo ka dhacday deegaan u dhow magaalada Kismaayo xarunta KMG ah ee maamulka Jubbaland.

Howl-galkan oo ay wadajir isaga kaashadeen ciidanka qaranka Soomaaliya iyo ciidamada cirka ee Mareykanka ayaa ka dhacay deegaanka Beerxaani oo qiyaastii 35 KM waqooyi galbeed ka xiga magaalada Kismaayo ee xarunta gobolka Jubbada Hoose.

Howl-galkan ayaa lagu bur-buriyay koox ka tirsan Al-Sjabaab oo isoo abaabushay, islamarkaana damacsanaa inay soo qaadaan weerar qorsheysan, sida lagu sheegay bayaan kasoo wasaaradda warfaafinta Soomaaliya.

“Howlgalka ayaa waxaa looga hortagey waxyeeladii ay doonayeen inay geystaan kooxda ka tirsan Khawaarijta,” ayaa lagu yiri qoraalka dowladda.

Xogta khasaaraha horudhaca ah ee gaaray maleeshiyaadka la duqeeyay ayaa inta la xaqiijiyay gaareysa illaa 10 dhimasho ah.

Mana jirto wax khasaare ah oo duqeyntan kasoo gaaray dadka rayidka, sida ay sheegtay dowladda federaalka Soomaaliya.

“Ciidanka qaranka Soomaaliya oo kaashanaya saaxiibada caalamka oo ciidanka Mareykanka ay qeyb weyn ka yihiin waxaa ka go’an ciribtirka Khawaarijta iyo ka hortagga weerarrada abaabulan ee kooxdu ku doonayso in ay ku dhibaatayso shacabka Soomaaliyeed,” ayaa ugu dambeyntiina lagu yiri qoraalka dowladda.