Xog: Odowaa oo go’aan adag ka gaaray saraakiisha ka soo dhuumata furimaha

[Deeq A.]

Xarardheere (Caasimada Online) – Taliyaha Ciidanka Xoogga Dalka Jeneraal Odowaa Yuusuf Raage ayaa gaaray go’aan cusub oo saraakiisha hoggaamisa qeybaha ciidanka iyo guutooyinka u uku cadaadinayo, si ay u gutaan waajibaadka qaran ee loo xil-saaray.

Taliyaha ayaa saraakiisha ku amray in aysan ka maqnaan hal habeen talisyada ay xukumaan, iyadoo taliyihii jebiya amarkaas loogu goodiyey in xilka laga qaadi doono, lana reystey doono.

Saraakiisha hoggaamisa ciidamada intooda badan ayaa iska joogi jiray magaalooyinka, sida Muqdisho, iyagoo ciidamada ay hoggaamiyaan uga soo tegi jiray deegaano fog iyo furimo dagaal oo lagu weerari jiray.

Ciidamo badan ayaa la weeraray sanadihii lasoo dhaafay oo lasoo afjaray,  iyagoo aan u diyaarsaneyn inay iska difaacaan cadowga, maadaama taliyahoodii uga tegay meel cidlo ah.

Taliyaha xoogga ayaa hadda safar ku maraya furimaha dagaalka ee gobollada dhexe ee dalka, labadii habeen ee lasoo dhaafay wuxuu ku hoyday degmada Ceeldheer, weligeedna ma dhicin in taliyaha ugu sareeya militeriga Soomaaliya uu furinta joogo waqti intaas la eg, hadda ka hor.

Taliye Odowaa ayaa intii uu joogay Ceeldheer wuxuu kormeer uu ugu kuurgelayo xaaladooda ugu tagay Ciidamada Xoogga Dalka iyo Geesiyaasha xaq u dirirka ah ee dadka degaanka ee ka howlgala Degmada Ceeldheer ee Gobolka Galgaduud.

Taliyaha ayaa Ciidamada ku bogaadiyay intii uu joogay Ceeldheer in dadkooda iyo dalkooda ay Khawaarijta ka difaacaan, kana xoreeyaan deegaanada ay weli ku harsan yihiin.

Taliyaha Xoogga Jeneraal Odowaa ayaa maanta u sii gudbay degmooyin kale oo Xarardheere ay ugu horeyso, halkaas oo ay sugan yihiin ciidamada qaranka iyo deegaanka ee dagaalka kula jira Khawaarijta, Xarardheere ay saldhig weyn u tahay ciidamo badan oo ka howlgala koonfurta gobolka Mudug oo ah dhul baaxad leh Shabaab-kuna ku xoogan yihiin.

Hadda kadib, waxaa dhamaatay qiyaanadii saraakiisha ugu sareysa ciidanka oo iska jooji jiray Muqdisho iyo magaalooyinka kale ee dalka, taasi oo hor seedi jirtay in ciidanka la geeyo oo difaac laga geliyo goob furin ah, kadibna laga tago, taasi oo mararka qaar Al-Shabaab u suutageli jirtay in ciidanka si fudud ay u laayaan.

Jeneraal Odowaa oo mar kale dhowaan loo soo magacaabay xilkaan, waayo aragnimo horana heystay, maadaama uu ahaa burburkii kadib taliyihii xoogga ee ugu waqtiga dheeraa intii uu xilkaas hayey ayaa hadda dib u abaabulaya dagaalkii Khawaarijta looga sifeynayey dalka, isagoo ku dhinac wada dib u habeynta ciidanka iyo cadaadinta saraakiisha hoggaamisa oo lagu dhaliilo inay is dhigteen.