Diyaarad ay ciidamada Turkiga leeyihiin oo burburtay iyo khasaare ka dhashay

[Deeq A.]

Ankara (Caasimada Online) – Afar qof ayaa geeriyootay kadib markii diyaarad nooca qumaatiga u kaca ah ay ku burburtay isbitaal ku yaalla Koonfur-galbeed ee Turkiga maanta, guddoomiyaha gobolka uu shilkaasi ka dhacay ayaa sheegay in shilkaas ay sababtay ceeryaamo aad u badan oo jirtay.

“Diyaarad helikobter ah ayaa dhulka ku dhacday ka dib markii ay ku dhufatay dabaqa afraad ee isbitaalka markii ay kacday,” ayuu yiri gudoomiyaha gobolka Mugla Idris Akbiyik.

Sidoo kale wuxuu sheegay in shilkaas ay ku dhinteen laba duuliye, dhakhtar iyo shaqaale saarnaa.

“Waxaa jirtay ceeryaamo xooggan, taasi oo sababtay in duuliyuhu uu arki waayo dabaqa hortiisa ah, sidaas ayey diyaaraddu ugu dhacday qeybta 4-aad ee dabaqa,” ayuu yiri Akbiyik, isagoo intaas ku daray in masuuliyiinta ay baarayaan sababta shilka.

Diyaaradda helicopter-ka ayaa ku soo kacday xaalad aan si wanaagsan loo arki karin, iyadoo ka soo duushay saqafka sare ee isbitaalka Mugla oo ku sii jeeday magaalada Antalya, sida lagu arkay sawirro uu baahiyay TV-ga NTV.

Helikobterka ayaa markaas la arkayay iyadoo ceeryaamo ku dhex jirta dhowr daqiiqo kadib markii ay kacday, ka hor inta aysan ku dhicin meel bannaan oo ku dhow cisbitaalka ay ku dhufatay, sida ay ku warrantay warbaahinta Turkiga.

Shilkan ayaa yimid wax ka yar labo toddobaad kadib markii lix askari ay dhinteen kadib markii ay isku dhaceen labo diyaaradood oo helicopter ah xili uu tababar ciidan ka socday gobolka Isparta ee koonfur galbeed dalka Turkiga.

Waqtigaas wasaaradda gaashaandhigga ma aysan cadeyn waxa sababay shilkaas, sidoo kale kan maanta dhacay weli kama aysan hadlin.