Xogta saldhigga milatari ee Somaliland siineyso Mareykanka

[Deeq A.]

Bebera (Caasimada Online) – Xukuumadda Somaliland ayaa haatan wadda qorshe ballaaran oo ay saldhig milatari ku siineyso dowladda Mareykanka, waxaana haatan socda dadaalladii ugu dambeeyay ee ku aadan hirgelinta saldhiggaasi milatari.

Wakiilka Somaliland u fadhiya Maraykanka Bashiir Good oo la hadlay warbaahinta ayaa shaaca ka qaaday in qorshahan uu si dadar leh ku socdo, wuxuuna xaqiijiyay in saldhigga ay ku martigelinayaan Mareykanka ay ka siinayaan magaalada Berbera ee gobolka Saaxil.

Sidoo kale wuxuu wakaaladda wararka Somaliland ee SOLNA u sheegay inay diyaar u yihiin in saldhig uu Maraykanku ka samaysto Berbera, isaga oo xusay in u wanaagsan tahay danaha labada dal.

“Somaliland waa u diyaar inay saldhig millatari siiso Maraykanka, haddii uu ka shaqeynayo masaalixda labada dal ee Somaliland iyo Maraykanku yeeshaan,” ayuu yiri Bashiir Good.

Waxaa kale oo uu intaas kusii daray in Somaliland ay ka go’an tahay inay cilaaqaad iyo iskaashi la yeelato Maraykanka iyo dalalka kale ee caalamka, si loo horumariyo xiriirkooda caalamiga ah.

Sidoo kale waxaa jira qorshe kale oo ay Somaliland ku dooneyso in Mareykanka ay uga hesho ictiraaf, waxaana ololahaas horkacaya xildhibaan ka tirsan Congress-ka Mareykanka oo la yirahdo Scott Perry, kaas oo aqalka horgeeyay xeer cusub oo u ololaynaya in Somaliland loo aqoonsado dal madax-bannaan.

Hindise sharciyeedka oo tirsigiisu yahay 10402 waxa uu hoosta ka xariiqayaa xasiloonida Somaliland ee tobanaanka sano socotay, ka go’naanta dimuqraadiyadda, iyo muhiimadda istiraatijiyadeed ee Geeska Afrika oo ah sababaha ugu muhiimsan ee aqoonsiga Maraykanka.