Madaxweyne Deni oo shaaciyey in uu diyaarsaday ciidan qaadi doona duullaan culus

[Deeq A.]

Boosaaso (Caasimada Online) – Madaxweynaha Puntland Saciid Cabdullaahi Deni ayaa maanta ku dhawaaqay dagaal ka dhan ah kooxda Al-Shabaab, isagoo shaaciyey in ciidamada Puntland ay galeen diyaar garow iyo heegan culus, si dhibaatooyinka kooxdaas ay uga dul-qaadaan shacabka Puntland.

Siciid Deni ayaa maanta magaalada Boosaaso uga qeyb galay munaasabad lagu daah-furay bangiga dhexe ee magaalada Boosaaso, isagoo halkaas ka iclaamiyey dagaal ka dhan ah Khawaarijta oo baad iyo cagajugleyn ku heysa ganacsatada Puntland.

“Waxaan bishaareynayaa reer Boosaaso, ganacsatada iyo guud ahaan reer Puntland in culeyskii iyo cagajugleyntii lagu hayey aan u diyaar garownay sidii looga dul qaadi lahaa shacabka, ciidanka Puntland wuxuu galay diyaar-garow culus, waxaan ku kalsoonahay diyaar garowga ciidanka, waxaadna maqli doontaan war farxad leh oo ku saabsan guulaha ay ciidankeenu gaari doonaan.

Sidoo kale Madaxweyne Deni ayaa maleeshiyaadka kooxdaas eek u dhuumaaleysta Puntland ugu baaqay inay isku soo dhiibaan maamulka, halka kuwa ajaanibta ah uu uga digay inay sii joogaan deegaanada maamulkaas.

Madaxweynaha Puntland ayaa shacabkiisa ugu baaqay inay isku diyaariyaan, kuna dhiiradaan inay garab istaagaan ciidamada loo diyaariyey inay galaan dagaalka Khawaarijta, kuwaas ooh adda diyaarsan, sida uu sheegay Deni.

Dhanka kale Siciid Deni ayaa ka hadlay in Puntland ay bilowday daraasad ku saabsan in ay sameysato lacag iyada u gaar ah.

“Dowladda Puntland waxay bilowday daraasada sameynta Lacag u gaar ah Puntland, sida wadamada Federaalka adduunka qaar ka mid ah u leeyihiin, Lacagtaasi oo mustaqbalka la jaan qaadi doonta nidaamka Maaliyadda Soomaaliya marka miyirka iyo Maskaxdu soo noqoto” ayuu yiri madaxweyne Saciid Cabdullahi Deni.

Sidoo kale wuxuu ku eedeeyay dowladda dhexe inay ka gaabisay sameynta lacag cusub, balse ay hadda iyagu tashan doonaan, haddii aan la helin lacag cusub oo uu yeesho dalka.

Puntland ayaa horay u qaadatay go’aanno ka dhan ah dowladda federaalka, waxaana ugu dambeeyay in dhowaan ay ku dhowaaqday in xiriirkii u jartay dowladda dhexe, ayna u dhaqmeyso si madax banaan, kadib khilaaf soo kala dhex-galay Deni iyo Xasan Sheekh.