Xog: Xasan Sheekh iyo Abiy Axmed oo berri ku kulmaya Ankara – Maxaa is-bedelay?

[Deeq A.]

Ankara (Caasimada Online) – Madaxweynaha Somaaliya Xasan Sheekh Maxamuud iyo Ra’iisul Wasaaraha Ethiopia Abiy Axmed ayaa lagu wadaa inay kullan fool ka fool ah ku yeeshaan magaalada Ankara ee dalka Turkiga.

Ilo ku dhow Madaxtooyada Soomaliya ayaa Caasimada Online u xaqiijiyay jirataanka kulanka Ankara ee Xasan iyo Abiy, waxayna sheegeen in Ethiopa ay codsatay kulanka, Madaxweynaha Soomaaliya-na uu aqabalay.

Kulankan oo lagu wado inuu ka dhaco magaalada Ankara Arbacada berri ayaa noqonaya kii ugu horreeyay ee ay labada masuul yeeshaan, tan iyo markii Itoobiya ay cadeysayay damaceeda oo heshiiskii badda ay la gashay Muuse Biixi 1-dii bishii Janaayo ee sanadkan sii dhamaanaya.

Heshiiskaas ayaa dowladda Soomaaliya waxay ku tilmaantay mid sharci darro ah oo ku xad gudbaya madax-banaanideeda, qaranimada iyo wadajirka dhuleed ee Soomaaliya.

Wixii xiligaas ka dambeeyay waxaa sii xumaanayay muranka labada waddan ka dhaxeeya, kulanka berri dhacaya ayaa noqonaya kii 3-aad, lamana saadaali karo natiijada.

Dowladda Soomaaliya ayaa maanta xaqiijisay in mowqifkii ay ka joogtay arrinta Itoobiya aysan waxaba iska bedelin, wadahadalada dhacayana ay dalbatay Itoobiya, casuumadana uu fidiyey madaxweynaha Turkiga Erdogan.

Billihii August iyo Septemper, ayaa wadahadallo laba wareeg ahaa oo uu Turkigu garwadeen ka ahaa ay guuldareysteen.

Isla bishii September ee sanadkan, Madaxweynaha Soomaaliya Xasan Sheekh Maxamuud ayaa diiday soo jeedin la xiriirta inuu la kulmo Ra’iisul Wasaaraha Itoobiya Abiy Axmed, xilli ay ka qeyb galayeen shirka Madasha Iskaashiga Shiinaha iyo Afrika ee ka dhacayay magaalada Beijing, sida laga soo xigtay ilo diblomaasiyadeed.

Madaxweynaha ayaa kullankaas shardi uga dhigay in Ethiopia marka hore ay ka noqoto Is-afgaradkii ay la saxiixatay Somaliland, 1-dii bishii Janaayo.

Madaxweynayaasha Jabuuti iyo Mauritania iyo Madaxweynihii hore ee Nigeria Olusegun Obasanjo oo ahaa ergeyga gaarka ah ee Midowga Afrika ayaa isku dayay inay dhex-dhexaadiyaan kulanka, balse kuma guuleysan.

Waxaa ka horeeyay, dadaal ay dooneysay dowladda Kenya inay labada madaxweyne isugu keento, kaasi oo isna fashilmay.

Dhawaan ayaa sidoo kale, Madaxweynaha Kenya Wiiliam Rutto waxa uu sheegay in isaga iyo Madaxweynaha Uganda ay doonayaan inay dhex-dhexaadiyaan Soomaaliya iyo Ethiopia.

VOA