Maxay ka wada-hadleen guddoomiyaha golaha shacabk iyo danjiraha dowladda Shiinuhu ?

[Deeq A.]

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa xafiiskiisa kulan kula qaatay safiirka dowladda Shiinaha u fadhiya Soomaaliya Danjire Wang Yu, waxayna ka wada hadleen xoojinta xiriirka labada dal iyo sidoo kale dardargelinta wada shaqeynta baarlamaanadda labada wadan.

Sidoo kale inta kulanka uu socday ayaa Guddoomiyaha Golaha Shacabka ee Baarlamaanka dalka iyo Safiirka dowladda Shiinaha u fadhiya Soomaaliya waxa ay ka wada hadleen sidii dowladda Shiinaha ay Baarlamaanka Soomaaliya uga caawin laheyd dhameystirka dhismaha iyo qalabeynta xarunta Baarlamaanka.

Danjiraha dowladda Shiinaha u fadhiya Soomaaliya ayaa sheegay in xiriirka Shiinaha iyo Soomaaliya uu mudo aad u dheer soo jiray hadana uu meel wanaagsan marayo waxaana uu balan qaaday inay sii dardargelin doono xoojinta xiriirka labada dal.

Guddoomiyaha Golaha Shacabka ee Baarlamaanka Jamhuuriyadda Federaalka Soomaaliya Mudane Sheekh Aadan Maxamed Nuur (Madoobe) ayaa dowladda Shiinaha iyo shacabkeeda uga mahadceliyay taageerada ay Soomaaliya siiyaan, waxaana uu tilmaamay in Soomaaliya iyo Shiinaha uu ka dhaxeeyo xiriir soo jireen ah oo dhinacyo badan ku dhisan.

Source: goobjoog.com