Khaatumo oo arrimo xasaasi ah ku eedeysay Puntland

[Deeq A.]

Laascaanood (Caasimada Online) – Maamulka SSC-khaatumo ayaa war-saxaafadeed uu soo saaray ku cambaareeyay fara gelin uu sheegay in Puntland ku hayso degaannadooda. 

Wasaaradda Warfaafinta SSC-Khaatumo ayaa ku eedaysay dowladda Puntland in ay fara gelin sharci-darro ah ku hayso degaannada Khaatumo islamarkaana carqalad ku waddo geeddi-socodka dhismaha Maamulkaasi. 

SSC-khaatumo waxay sheegtay in Puntland is hor-taag ku samaysay gargaarkii loo waday degaannada Khaatumo islamarkaana joojisay tallaalkii loo waday sidoo kalena warbixino aan sax ahayn oo ku saabsan SSC la wadaagtay hay’adaha Caalamiga ah. 

Maamulka SSC-khaatumo ayaa sidoo kale dowladda Puntland ugu baaqay in ay ka waan-toobaan tallaabooyinka ay ku tilmaantay fara-gelinta ee ka dhanka ah degaannada SSC-khaatumo. Hoos ka aqriso bayaanka SSC-Khaatumo 

War-saxaafadeed

6 February 2023, Shacabweynaha SSC-Khaatumo waxay gaadheen go’aan ah inay dhistaan Maamul u gaar ah, kaas oo ka dhabeeya rabitaankooda, Maamulkaas oo Dawladda Federaalku si buuxda u aqoonsatay inuu matalo kana arrimiyo Sool, Sanaag iyo Ceyn. Go’aan kaas oo ay soo dhaweeyeen Maamulka, waxgaradka iyo shacabweynaha Puntland waqtigii lagu dhawaaqay.

Maamulka SSC-Khaatumo waxa uu si adag u cambaareynayaa faragalinta sharci-darrada ah ee Puntland ku hayso arrimaha gudaha ee deegaannada SSC-Khaatumo. Puntland oo umuuqanaysa inay isku dayayso carqaladeynta geeddi-socodka iyo horumarka ka hanaqaaday deegaanadan, qaar ka mida madaxda usaraysa Puntland waxay ku hawlanyihiin tallaabooyin baalmarsan go’aamadii 6 February, kuwaas oo wax udhimaya wada dhalashada, daris wanaagga iyo iskaashi buuxa oo dhexmara labada Maamul.
Waxaa intaa dheer, Intii Maamulka SSC-Khaatumo la yagleelay Puntland waxay qaadday tallaabooyin ay ku curyaaminayso jiritaanka Maamulka SSC-Khaatumo, tallaabooyinkaas waxaa kamid ah:-

• Is-hortaag lagu sameeyay tallaalkii loo waday Maamulka SSC-Khaatumo.
• Siyaasadayn & hakin lagu sameeyay gargaarkii SSC-Khaatumo.
• Dacwayn & cagajuglayn lagu sameeyay Hay’adda Alight oo deegaannadan ka fulinaysa mashaariic waxtar u leh deegaanka.
• Isku day xilal ay ka magacawdo deegaanka qaarkii sidii ay samaysay Wasaaradda Caafimadka Puntland.
• Warbixinno aan sax ahayn oo Puntland la wadaagto hay’adaha Caalamiga ah ee xaruntoodu tahay Nairobi.
• Puntland waxay si aan gabbasho lahayn magacyada gobolladda Sool & Cayn ugu soo dartay Ciyaaraha ka socda Puntland, iyagoo soo uruuriyay dad aan matelin ciyaartoyda ka soo jeeda SSC-Khaatumo. Goboladda iyo Degmooyinka SSC-Khaatumo qayb kama aha ciyaarahaa.

Puntland waxay si toos ah u carqaladeyneysaa dadaallada ay wadaan Maamulka SSC-Khaatumo si ay u dhisaan hore usocodka Maamulka oo ku saleysan rabitaanka shacabka deegaanka, taasoo ah xaq dastuuri ah.

Maamulka SSC-Khaatumo waxa uu ugu baaqayaa Puntland inay joojiso faragalinta iyo ficillada wax u dhimaya wadajirka iyo horumarka deegaanka SSC-Khaatumo.

Maamulka SSC-Khaatumo isagoo ka duulaya siyaasad ku salaysan sidii lagu gaadhi lahaa iskaashi buuxa oo dhexmara labada Maamul waxa uu magacaabay guddiga wada-hadalka iyo iskaashiga SSC-Khaatumo iyo Puntland, nasiib darro halkii laga eegayay inay Puntland soo magacawdo guddi hawshaa uqaabilsan waxaa ay bilawday faragalin ka dhan ah Maamulka iyo Shacabka SSC-Khaatumo.

Mar kale, waxaanu ugu baaqaynaa Dawladda Puntland inay ka waantowdo waxkastoo dhaawici karaya wada dhalashada iyo iskaashiga taariikhiga ah ee ka dhaxeeya labada shacab.