Hoggaamiyaha ciidanka qabsaday Suuriya oo ku dhawaaqay tallaabo culus

[Deeq A.]

Dimishiq (Caasimada Online) – Hoggaamiyaha ugu weyn ee Islaamiyiinta Suuriya, Abuu Maxamed Al-Jowlani ayaa ku dhawaaqay in lala xisaabtami doono saraakiisha sar-sare ee taliskii Bashar Al-Asad ee xukunka laga tuuray.

Saraakiishan oo ku lug lahaa jirdil iyo tacadiyo kale oo loo gaystay maxaabiista siyaasadeed ayaa haatan wajihi doono cadaaladda, sida uu shaacuyay hoggaamiyaha kooxda la wareegtay xukunka Suuriya.

Qoraal uu soo dhigay baraha bulshada gaar ahaan barta Telegram ayuu hoggaamiyuhu ku sheegay in la soo daabici doono magacyada saraakiisha jirdilka geystay.

Al-Jowlani ayaa sidoo kale sheegay in dib loo soo celin doono dadka Suuriyiinta ah ee u qaxay dalalka kale.

Kooxda mucaaradka Suuriya ayaa Axaddii soo afjaray xukunkii Bashar Al-Asad oo dalkaasi muddo dheer kasoo talinaayey, kadib markii ay qabsadeen magaalada caasimadda ah ee Dimishiq.

Bashar ayaa hadda ku sugan dalka Ruushka oo magangalyo laga siiyay isaga iyo qoyskiisa, sida ay sheegtay warbaahinta Ruushka.

Jabhadda Xayaat Taxriir Al-Sham ayaa xukun ka tuurista Asad ka shaacisay xarunta raadiyaha iyo teleefishinka qaranka ee Suuriya.

Qabsashada xukunka ee Jabhadda Xayaat Taxriir Al-Shaam iyo xulufadeeda ayaa ka dhigan in Suuriya ay u dhaqaaqday jiho cusub iyo inay gashay waayo ka beddalan kuwii ay kusoo jirtay kontonkii sano ee lasoo dhaafay.