Xog: R/Wasaare Xamza oo ku wajahan Raaskambooni + Qorshaha

[Deeq A.]

Muqdisho (Caasimada Online) – Ra’iisul Wasaaraha Soomaaliya Xamza Cabdi Barre ayaa ku wajahan magaalada Raaskambooni ee gobolka Jubbada Hoose ee dowlad-goboleedka Jubbaland.

Ra’iisul Wasaaraha ayaa maanta tegi doona Raaskambooni, iyadoo ay halkaasi gaareen taliyaha ciidanka lugta, saraakiil ka tirsan xafiiska ra’iisul wasaraha iyo ilaaladiisa gaarka, sida ay ogaatay Caasimada Online.

Raaskambooni oo maalmo kahor la wareegeen ciidanka dowladda federaalka Soomaaliya ayaa noqoneysa xarunta ay dowladda dhexe ka hageyso qorshaha ka dhanka ah Axmed Madoobe oo isagu mar saddexaad isku doortay Kismaayo.

Sida uu qorshuhu yahay Xamza ayaa marka uu gaaro halkaasi waxa uu kulamo kala duwan la qaadan doonaa saraakiisha Gorgor iyo kuwa Haramcad oo iyagu gacanta ku haya amniga Raaskambooni, odayaasha deegaanka iyo qeybaha kala duwan ee bulshada.

Safarka ra’iisul wasaaraha ayaa imaanaya xilli ay kasii dareyso xiisadda dowladda federaalka iyo maamulka Jubbaland ee uu hoggaaminayo Axmed Madoobe, oo isagu dhawaan qabsaday doorasho markii saddexaad uu kusoo baxay hoggaanka maamulka.

Daraawiishta Jubbaland ee Axmed Madoobe taabacsan ayaa haatan ku sugan deegaan 40-KM u jira magaalada Raaskambooni, halka ciidamada dowladda Soomaaliya oo ka war helay dhaq-dhaqaaqan ay heegan buuxa galeen, waxaana sareysa cabsida in dagaal uu ka dhex-qarxo labada dhinac.

Shalay ayey aheyd markii Jubbaland ay muddo 48 saac ah u qabatay in ciidamada dowladda ay uga baxaan gobolka, iyada oo ku goodisay haddii ay bixi waayaan inay ka qaadi doonto tallaabo adag.