Dadka Suuriya ee jooga Soomaaliya oo si cajiib ah uga hadlay ‘cayrinta Bashar al-Assad’

[Deeq A.]

Hargeysa (Caasimada Online) – Magaalada Hargeysa ee Somaliland waxaa maanta ka dhacay banaanbax weyn oo lagu soo dhaweynayo in xukunkii laga tuuray madaxweynihii sanadaha badan awoodda militeri ku heystay dlka Suuriya Bashar al-Assad.

Banaanbaxaan waxaa dhigay dadka Suuriyaanka ah eek u nool magaalada Hargeysa, waxayna muujiyeen dareen dabacsan iyo sida ay ugu farxeen in Madaxweyne Bashar al-Assad uu ka tegay Suuriya, isagoo qasban.

Maxamed Kheyr oo kamid ah dadka ka soo cararay colaadaha Suuriya iyo xukunkii adkaa ee Bashar al-Assad ayaa warbaahinta kula hadlay magaalada Hargeysa, isagoo sheegay in qof kasta oo Suuriyaan ah uu maanta faraxsan yahay.

“Qofta kasta oo Suuriyaan ah, guud ahaan muslimiinta, Carabta iyo Afrikaanka waa farxeen, sababtoo ah waa na jecelyihiin, dulimigii iyo dhagartii qoys 50 sano na xukumayey ayaa naga tegay,” ayuu yiri Maxamed Khayr oo ah Suuriyaan ku noopl Hargeysa.

Maxamed oo ah nin oday ah, isagoo ilmeynaya ayuu sheegay in tan iyo carruurnimadiisii uu xusuusto nidaamkii adkaa ee Assad oo ahaa aabihii dhalay Bashar Assadka hadda xukunka laga tuuray.

Dhinaca kale, Haysam Cabdisalaan oo ah wiil dhalinyaro ah oo sagaal sano ku noolaa Hargeysa, isla markaana bartay Af-Soomaaliga ayaa si cajiib ah u cabiray dareenkiisa ku aadan is bedelka siyaasadeed ee Suuriya ay gashay.

“Sagaal sano ka hor ayaan imid halkaan, waxaan bartay af-Soomaaliga oo aad u adag, walaahi waxaa dhacay is bedel weyn 50 sano musiibo dalkeena heysatay ayaa na dhaaftay, Somaliland waa dalkeyga labaad, xaas iyo carruur ayaa ii jooga, Alxamdulilaah,” ayuu yiri Haysam Cabdisalaan oo Suuriya u dhashay.

Guddoomiyaha urur ay ku mideysan yihiin dadka Suuriyaanka ah ee ku nool magaalada Hargeysa Wafaan Saam Al-Saayid ayaa sheegay in Suuriya ay gashay xaalad deg deg ah oo lama filaan ah, isla markaana ay dalkoodii ku noqo doonaan, markii ay xaqiijiyaan in xaaladu degtay.

“Kadis ayey noqotay arrintaan, waa wax xagga alle ka socda, ilaah ayaa xoreeyey dhulka Shaam, adduunka dhan waa na jecelyahay, laakiin dalkeena waxaa la degay qoyska reer Assad, hadii amniga la sugo waan ku laabaneynaa Suuriya, dadka Soomaaliyeed ayaa aad noo soo dhaweeyey, Somaliland waa dalkeena labaad,” ayuu yiri guddoomiyaha qaxootiga Suuriya ee Hargeysa ku nool.