Reer Galbeedka oo si yaab leh u taageeray qorshihii xukunka looga tuuray Assad

[Deeq A.]

Dimishiq (Caasimada Online) – Qaar ka mid ah hoggaamiyayaasha reer Galbeedka ayaa soo dhaweeyay dhicitaanka madaxweynihii Suuriya Bashaar Al-asad oo jabhado hubeysan inay dalkii ka qabsadeen, isla markaana isaga cararay, waxaana lasoo sheegayaa inuu magan-geliyo ka helay Ruushka.

Ingiriiska, Faransiiska iyo Jarmalka ayaa soo dhaweeyay dhicitaanka xukunkii Bishar Al-Asad, iyagoo xukunkiisii ku tilmaamay mid aan arxan laheyn.

Madaxweynaha Faransiiska Emmanuel Macron ayaa barihiisa bulshada ku soo qoray farriin nuxurkeedu ahaa “Dawlad bahalnimo ayaa dhacday, ugu dambeyntii. Waxaan u mahadcelinayaa shacabka Suuriya, geesinimadooda, dulqaadkooda, xilliga hubanti la’aanta ah, waxaan u dirayaa hamigayga nabadda, xorriyadda, iyo midnimada. Faransiiska wuxuu sii ahaan doonaa mid ay ka go’an tahay ammaanka dhammaan Bariga Dhexe.”

Hoggaamiyaha Jarmalka Olaf Scholz ayaa ku tilmaamay dhicitaanka Assad “war wanaagsan” wuxuuna ku booriyay xal siyaasadeed oo lagu xasilinayo Suuriya, sida ay sheegtay AFP.

“Bashaar Al-Asad waxa uu si naxariis darro ah u dulmay dadkiisa, waxaana uu dad badan u horseeday in ay qaxaan, kuwaas oo qaar badan oo ka mid ah ay gaareen Jarmalka,” ayuu yiri Scholz.

Ra’iisul wasaare ku xigeenka UK Angela Rayner ayaa sheegtay in haddii taliska Asad uu dhacay ay “dowladda Britain soo dhawaynayso warkaas”.

Guushan la yaabka leh ee ay Jabhadaha Suuriya ka gaareen waxaa hoggaaminaya kooxda ugu awoodda badan Islaamiyiinta ee Xayat Taxrir al-Sham oo ah cudud siyaasadeed iyo mid militari.

Waxay kooxda soo caanbaxday kacdoonkii Suuriya ee 2011-kii iyada oo xiriir leh Al-Qaacida, laakiin waxay si rasmi ah xiriirka ugu jartay 2016-kii, kooxdaas waxaa hoggaamiya Abu Mohammed al-Jawlaani.

Mar uu hadlay maanta wuxuu u xaqiijiyay bulshooyinka laga tirada badan yahay ee Suuriya in aysan jirin sabab ay uga welwelaan, balse kooxdiisa Xayaat Taxriir al-Sham waxay wali dawladaha reer galbeedku u aqoonsan yihiin urur argagixiso.