Biden oo dembi ‘qiyaano qaran ah’ ka cafiyey wiilkiisa iyo Trump oo ku gacan seyray

[Deeq A.]

Washington (Caasimada Online) –Madaxweynaha Mareykanka Joe Biden, ayaa si rasmi ah cafis ugu fidiyay wiilkiisa, Hunter Biden, kaas oo lagu waday in bishan maxkamaddu xukunto.

Wiilka Biden ayaa loo heystay dembiyo la xirriira inuu si sharci darro ah u heystay hub iyo canshuur khiyaameyn ah.

Madaxweyne Biden ayaa horay u sheegay, inuusan cafis u fidin doonin wiilkiisa ama uusan dhimi doonin sanadaha ay maxkamaddu xukunto.

Hunter Biden, ayaa bishii Septeembar qirtay dacwaddan lagu soo oogay, waxaana lagu helay inuu isticmaalayay daroogo sharci darro ah.

Wiilka Biden ayaa noqday canugii ugu horreeyay ee madaxweyne xil haya uu dhalay oo dacwado lagu soo oogo dalka Mareykanka.

Madaxweynaha la doortay ee Mareykanka Donald Trump, ayaa cafiska Biden ku tilmaamay “tacaddi iyo cadaalad dhicisoowday.”

Qaar kamid ah xubnaha xisbiga Jamhuuriga ayaa Joe Biden ugu yeeray “beenaale”.

Madaxweynaha xilka ka sii degaya ee Mareykanka Joe Biden ayaa haatan noqday madaxweynihii ugu horreeyay ee Mareykanka oo cafis u fidiya wiilkiisa oo loo heysto dembiyo culus.

Kiiskaan ayaa si weyn looga hadal hayaa dalka Mareykanka, dadka intooda badan waxay Biden ku dhaliilayaan go’aanka uu ku cafiyey wiilkiisa oo ay ku tilmaameen “ku takrifal awoodeed” waxaana la eegi doonaa go’aanka uu Trump ka qaato kiiska loo heysto wiilka Biden.