La-taliye sare oo ka tirsan xafiiska R/W XAMZA oo is-casilay + Sababta

[Deeq A.]

Muqdisho (Caasimada Online) – La-taliyaha sare arrimaha haweenka iyo xuquuqul insaanka ee xafiiska ra’iisul wasaraha Soomaaliya, Shamsa Cabdulqadir Daahir ayaa shaacisay inay iska casishay xilkii.

Shamsa oo warqadeeda is-casilaada ku socodsiisay xafiiska ra’iisul wasaaraha ayaa waxay ku sheegtay in casilaadeeda ay timid kadib markii ay aragtay cadaalad darro baahsan, ku takri fal awoodeed iyo far-gelin joogto ah.

“Anigoo ah Marwo Shamsa Cabdulqadir Daahir, ahna la-taliyaha sare arrimaha haweenka iyo xuquuqul insaanka ee xafiiska ra’iisul wasaraha, waxaan halkaan ku caddaynayaa in aan si rasmi ah iskaga casilay xilkii aan ka hayay xafiiska, kadib markii aan arkay caddaalad darro baahsan, ku takri fal awoodeed iyo faro galin joogta ah, duudsiin xuquuq iyo caburin shaqo oo la xiriirta shaqadii la ii igmaday,” ayey Shamsa ku tiri warqadeeda is-casilaada.

Shamsa ayaa sidoo kale waxay sheegtay in deegaanka ay kasoo jeedo ee Jubbaland lagu hayo beegsi, islamarkaana lagu dulmiyay xuquuqdeedii shaqo ee dastuuriga aheyd.

“Waxaan u mahad celinayaa dhammaan dadkii aan wada shaqaynay ee sida niyad samida ah iila shaqeeyay inta aan xafiiska joogay,” ayey tiri Shamsa oo aheyd la-taliye sare oo ka tirsan xafiiska ra’iisul wasaare Xamza.

Shamsa oo qeyb ka noqoneysa masuuliyiinta kasoo jeeda Jubbaland ee iska casilay xukuumadda federaalka, ayaa sidoo kale waxay sheegtay inay u dulqaadan weyday beegsiga sida gaarka loogu haayo bulshada maamulka Jubbaland oo ay sheegtay in si sharci daro fara-galin ugu heyso xukuumadda.

Dowladda dhexe iyo maamulka Jubbaland ayaa kala furtay kadib markii xukuumadda federaalka ay si adag uga hortimid dib u doorashada Axmed Madoobe, iyadoo waaran soo qabasha ahna u jartay Madoobe, kadib markii ay ku eedeysay fal-dambiyeedyo kamid yihiin khiyaano qaran.