Falcelin aan caadi ahayn oo ka dhalatay tallaabadii ay qaadeen golaha wasiirada

[Deeq A.]

Muqdisho (Caasimada Online) – Falcelin aan caadi ahayn ayaa ka dhalatay tallaabadii ay xalay qaadeen xubnaha golaha wasiirada Soomaaliya, kadib markii ay kulan deg-deg ah oo ay yeesheen ku ansixiyeen guddiga madaxa bannaan ee doorashooyinka iyo sohdimaha.

Guddiga oo ka kooban 18 xubnood ayaa ka shaqeyn doono maamulidda doorashooyinka heerarka kala duwan ee dalka  iyo in ay hirgaliyaan doorashooyin qof iyo cod ah oo hufan.

Wasaaradda arrimaha gudaha Soomaaliya ayaa soo gudbisay guddigaan, waxaana sidoo kale loo gudbinayaa baarlamaanka federaalka Soomaaliya, si loo ansixiyo.

Tallaabadan ayaa kusoo aaday, xilli xasaasi ah oo ay weli taagan tahay xiisad ka dhalatay hannaanka loo wajahayo doorashooyinka dalka, ayada oo qorshaha Villa Soomaaliya ay si weyn uga biyo diidan yihiin maamullada Jubbaland, Puntland iyo siyaasiyiinta mucaaradka.

Haddaba sidee looga falceliyay tallaabada ay qaadeen golaha wasiirada Soomaaliya?

Qaar kamid ah dadweynaha Soomaaliyeed ee isticmaala baraha bulshada ayaa siyaabo kala duwan uga hadlay magacaabista guddiga qaran ee doorashooyinka dalka.

Cabdiraxmaan Cismaan Maxamed “Xagee ka hirgalee doorasha lagu muransanyahay cirka maa lagu qaban dhulka anaga ayaa joognee!?”.

Cabdinaasir Garweyne “Doorashada waa toos, waana qof iyo cod ninkii is hubaa shacabka Soomaaliyeed ha hor yimaado”.

Ciise Cabdullaahi “Dadkaan xagee laga soo aruurshay aan hal qof caan ka aheyn ma Raage Ceelle iyo Godey”.

Maxamed Cabdullaahi Xasan “Teendhadu waa lagama maarmaan bulshaduna idin fahantay adeer”.

Zakariye Cali Dayib “Hambalyo, waxaan u rajeynaa doorashada inay u qabtaan si hufan oo cadaalad ah”.

Cabdifitaax Macallin “Waan soo dhawaynaynaaa..Dalka dabarka ku xiran in Laga furo waa laga maarmaan”.

Cabdi Cali Maxamed ayaa isaguna falcelintiisa ku yiri “Looma dhamo guddi ma noqon karaan”.