BFS oo maanta go’aan ka gaaray guddiga doorashooyinka qaanka

[Deeq A.]

Muqdisho (Caasimada Online) – Xildhibaannada labada gole ee baarlamaamka oo maanta kulan wadajir ah ku yeeshay Muqdisho ayaa meel-mariyay guddiga madaxa banaan ee doorashooyinka iyo sohdimaha ee ay xalay soo magacaabeen golaha wasiirada Soomaaliya.

Xildhibaannada ayaa cod aqlabiyad leh ku ansixiyay guddiga doorashooyinka, waxaana ogolaaday 169 Mudane, waxaa diiday 6 xildhibaan, mana jirin xildhibaan ka aamusay, sida uu shaaciyay guddoomiye Sheekh Aadan Maxamed Nuur (Aadan Madoobe).

Intaas kadib xubnaha guddiga doorashada oo ka kooban illaa 18 xubnood ayaa isla fadhiga maanta lagu dhaariyay, si ay u gutaan waajibaadka shaqo ee loo igmaaday.

Dhinaca kale, waxaa kulanka inta uu socday hareeyay buuq ay sameeyeen xildhibaannada qaar oo gacmaha iskula tegay, sida laga arki arko muuqaalo ka yimid baarlamaanka.

Xildhibaannada buuqa sameeyay ayaa u badan kuwa mucaaradka iyo xubno kale oo taabacsan maamulka Jubbaland, balse ugu dambeyn waa laga cod badiyay.

Guddiga la ansixiyay ayaa ka shaqeyn doono maamulidda doorashooyinka heerarka kala duwan ee dalk iyo in ay hirgeliyaan doorashooyin qof iyo cod ah oo hufan.

Wasaaradda arrimaha gudaha Soomaaliya ayaa soo gudbisay guddigaan, waxaana xalay ku dhawaaqay golaha wasiirada oo kulan deg-deg ah ku yeeshay xafiiska ra’iisul wasaaraha.

Tallaabadan ayaa kusoo aadayeysa, xilli xasaasi ah oo ay weli taagan tahay xiisad ka dhalatay hannaanka loo wajahayo doorashooyinka dalka, ayada oo qorshaha Villa Soomaaliya ay si weyn uga biyo diidan yihiin Jubbaland, Puntland iyo mucaaradka.