Maxaa ka socda Kismaayo kahor doorashada beri ee JUBBALAND?

[Deeq A.]

Muqdisho (Caasimada Online) – Magaalo xeebeedka Kismaayo ee xarunta gobolka Jubbada Hoose waxaa maanta ka socda dhaq-dhaqaaqii ugu dambeeyay ee doorashada madaxweynaha Jubbaland oo lagu wado inay beri ka dhacdo gudaha magaaladaasi.

Waxaa haatan magaalada ka socda hadal-jeedinta musharixiinta shalay is-diiwaangeliyay oo gaaraya illaa 4 musharrax oo kala ah 1-Axmed Maxamed Islaam (Axmed Madoobe), 2- Faysal Maxamed Mataan, 3- Abubakar Cabdi Xasan iyo 4- Dr Cabdi Xasan Xajiin, kuwaas oo hortegay golaha wakiilada saddexaad ee Jubbaland, waxayna usoo bandhigayaan barnaamijkooda siyaasadeed.

Musharixiinta is-diiwaangeliyay waxaa ugu cad madaxweynaha hadda talada haya Axmed Madoobe oo shalay qaatay shahaadada, kaas oo doonayo in markii saddexaad uu sii hoggaamiyo maamulka, wuxuuna ballan qaaday inuu dhameystiri dooni shaqada u taallo.

“Aadbaan ugu faraxsanahay inaan isku soo taago aniga oo rabo inaan dhameystiro wixii aan ka tegay, waxaana gaarsiin doonaan meel fiican” ayuu shalay yiri Axmed Madoobe.

Ninkan ayay iska cadahay inuu kusii bixi doono doorashada beri dhaceysa, maadaama uu uu isagu gacantiisa ku maamulanayo doorashada ka socota magaalada Kismaayo.

Sidoo kale arrinta kale ee meesha ku jirto ayaa ah in musharixiinta is-diiwaangeliyay ay yihiin kuwa malxiisayaal ah uun, waxaana doorashadan bannaanka ka jooga xubnaha musharixiinta mucaaradka oo iyagana Kismaayo ka wada dhaq-dhaqaaq kale oo siyaasadeed.

Dowladda Federaalka ayaa sidoo kale dibadda ka joogta doorashada Jubbaland, taas oo iyana saameyn ku leh doorashadaas, waxayna horay u sheegtay in aanay aqoonsan doonin maamulka ka yimaada halkaas, iyada oo boob ku eedeysay madaxweyne Axmed Madoobe.

Dhinaca kale ammaanka ayaa aad loo adkeeyay, waxaana waddooyinka magaalada lasoo dhoobay ciidamo dheeraad ah oo sugayo amniga inta ay socota doorashada.

Jubbaland ayaa mar kasta oo la gaaro doorashadeeda gashay xaaladdan oo kale, waxaana sababta ay tahay in Axmed Madoobe uu isku sii dhajinayo kursiga & inuu sii joogo xafiiska.