Mareykanka oo sameeyey ‘khalad weyn’ iyo Erdogan oo digniin culus ka soo saaray

[Deeq A.]

Ankara (Caasimada Online) – Ogolaanshaha Washington ee ah in Ukraine ay gantaallada Mareykanka u adeegsato bartilmaameedyo militari oo gudaha Ruushka ku yaalla waa “khalad weyn” oo dunida u jiidi kara dagaal weyn”, waxaa sidaas maanta yiri madaxweynaha Turkey Recep Tayyip Erdogan.

Tallaabada Kyiv loogu ogolaaday inay isticmaasho gantaallada riddada dheer ee ATACMS ayaa ka dhiggan isbedel weyn oo ku yimid siyaasadda Maraykanka, taasi oo dhalisay jawaab caro leh oo ka timid Moscow.

Moscow ayaa Talaadadii ballaarisay baaxadda marka ay isticmaali karto hubka nukliyeerka, taasi oo ah digniin cad oo ku wajahan Ukraine iyo Reer Galbeedka.

“Tallaabadan uu qaaday (Madaxweynaha Mareykanka Joe) Biden kaliya ma sii kordhin doonto colaadda, laakiin waxay horseedi doontaa falcelin weyn oo ka timaada Ruushka,” ayuu yiri madaxweyne Erdogan.

“Waxayna gobolka iyo caalamka qarka u saari kartaa dagaal weyn,” ayuu sidoo kale madaxweynaha Turkiga u sheegay saxafiyiinta ka hor inta aanu raacin diyaaraddii uu kaga soo laabatay shirkii G20 ee Rio.

Sidoo kale wuxuu sheegay in go’aanka Mareykanka loo fasiran karaa inuu yahay tallaabo lagu hurinayo dagaalka, si loo hubiyo inuusan waligiis dhammaanin oo xitaa sii fido.

Waxa uu tilmaamay in wareegtada Talaadadii uu saxiixay madaxweynaha Ruushka Vladimir Putin ay u ogolaaneyso Moscow inay bixiso jawaab Nukliyeer, haddii lagu soo qaado weerar cirka ah oo baaxad leh, xitaa haddii kaliya loo isticmaalo hub caadi ah.

“Khaladka ugu yar ee lagu sameeyey khaladkan weyn. Wuxuu la mid noqon doonaa sida budo lagu shubay dab, marka waxaan kula talinayaa qof walba inuu taxaddaro,” ayuu yiri.

Turkey oo xiriir saaxiibtinimo la leh labadan dal ee jaarka kala ah ee Badda Madow, ayaa Ukraine siisay diyaaradaha aan duuliyaha lahayn, balse waxay ka fogaatay inay dhaqan-geliso cunaqabataynta reer galbeedka ee Moscow.

Dib u eegista uu Putin ku sameeyay siyaasadda Nukliyeerka ee Ruushka ayaa waxaa si degdeg ah u cambaareeyay Washington, Brussels iyo London oo ku tilmaamay “mas’uuliyad darro,” waxaana Erdogan uu sheegay in tallaabadan ay tahay in NATO ay darasto.

“Tallaabada uu qaaday Ruushka waa in ay ka fakaraan mas’uuliyiinta NATO sidoo kalena dib u eegis lagu sameeyo,” ayuu ku sheegay shir jaraa’id oo uu Talaadadii ku qabtay magaalada Rio.

“Ruushka waxa uu leeyahay awood iyo tallaabooyin uu isku difaaco, si la mid ah, sida wadamada NATO, waa in aan qaadnaa tallaabooyin aan ku ilaalineyno nafteena,” ayuu yiri.

The post Mareykanka oo sameeyey ‘khalad weyn’ iyo Erdogan oo digniin culus ka soo saaray appeared first on Caasimada Online.