Tirinta codadka Doorashada madaxtooyada Somaliland oo Socota iyo Natiijo horudhaca ah oo lagu dhawaaqayo maanta

[Deeq A.]

Doorashada madaxtinimada Somaliland iyo tartanka axsaabta ayaa xalay la soo afjaray, iyada oo xilligan lagu guda jiro tirinta codadka.

Guddiga Doorashooyinka Somaliland (NEC) ayaa sheegay inay tirinta codadka si habsami leh u socoto, ayna filayaan in natiijooyinka horudhaca ah lagu dhawaaqi doono maanta.

Doorashadan oo ah mid xasaasi ah, ayaa waxay saameyn weyn ku yeelan doontaa mustaqbalka siyaasadeed ee Somaliland, iyadoo xisbiyada iyo ururada siyaasadeed ee soo gudba ay ka mid noqon doonaan axsaabta rasmiga ah.

Doorashadu waxay muhiimad u leedahay ololaha Somaliland ee qaddiyadda aqoonsi raadinta.

Beesha caalamka oo xiisaynaysa geedi socodka dimuqraadiyadda Somaliland ayaa u aragta doorashadan tijaabo muhiim ah oo muujinaysa dedaalkooda xagga dimuqraadiyadda iyo xasiloonida. Gobolka Geeska Afrika, oo ay dhibaatada siyaasadeed iyo colaadaha ku sii kordhayaan, waxay Somaliland u noqotay tusaale wanaagsan oo ku dayasho mudan marka la eego xasilloonida iyo dimuqraadiyadda ay gaareen.

Waxaa sidoo kale la filayaa in doorashadu ay wax ka beddesho awood qaybsiga siyaasadda iyo saameynta beelaha Somaliland. Xisbiga Waddani iyo xisbiga talada haya ee Kulmiye labaduba waxay ballanqaadeen inay xoojin doonaan dedaalada lagu mideynayo bulshada, gaar ahaan deegaamada bariga Somaliland, si ay u helaan ka qaybgal buuxa oo siyaasadeed.

Source: goobjoog.com