Yaa ku haray isbahaysigii dhaliyay isbedelkii uu kusoo baxay Xasan?

[Deeq A.]

Muqdisho (Caasimada Online) – Jubaland waxay kamid ahayd isbahaysigii mucaaradka ee lagu soo afjaray xukunkii Nabad iyo Nolol, waxayna kaalin muuqatay ka qaadatay isbedelkii dalka ka dhacay 15-kii May 2022 ee dib loogu doortay madaxweyne Xasan Sheekh Maxamuud.

Jubaland kuma qasaarin isbedelkaas, waxayna federaaalka ka heshay maamuuski ugu waynaa dhanka siyaasadda, iyada oo la siiyay wasiirka koowaad ee xukuumadda.

Labadi sanoo ee lasoo dhaafay, waxaa lagu wada socday degganaan iyo feejignaan u muuqatay in la leeyahay hal hiigsi laakin wax kasta waxay si kedis ah isku bedeleen markii la furay faylka doorashooyiinka.

Mucaaradkii saldhigoodu ahaa Muqdisho ee ka tirsanaa isabahasyigaas maanta intooda badan waa mucaarad, waxayna xukuumadda hadda joogta u jiraan masaafo la eg tii ay u jireen dowladdii Farmaajo.

Puntland kuma negaan agjooga iyo la shaqaynta federaalka waxayna xuduudkeeda xiratay markii isbedel lagu sameeyay qaybo ka mid ah cutubyada dastuurka, inkasta oo la aamisanyahay inuu markii horeba jiray salluug siyaasadeed .

Villa Somalia waxay geed dheer iyo mid gaaban u fuushay sidii ay dalka uga hirgelin lahayd doorasho qof iyo cod ah. Doorashadaas waxaa lagama maarmaan u ah in loo helo heshiis siyaasadeed oo ay qalinka ku duugaan madaxada federaalka iyo kuwa dowlad goboleeyada. Sharciyeynta heshiiskaas waxaa u xilsaaran Baarlamaanka halka ay xukuumaddu leedahay hirgelin doorashada qof iyo codka.

Ilaa iyo hadda waxaa intaas ogol gobolka Banaadir iyo dowlad goboleedyada Hirshabeelle, Koonfur Galbeed iyo Galmudug.

Dhacdooyinka ka dhashay khilaafka Dowladda Dhexe iyo Jubaland

7dii October- Madaxweynaha Dowladda Goboleedka Jubbaland, Axmed Sheekh Maxamed iyo wafdigiisa ayaa isaga baxay shirkii Golaha wadatashiga Qaran ee xilligaas ka socday magaalada Muqdisho, iyada oo aan wax heshiis ah laga soo saarin shirka.

13-kii October- Ergeyga Gaarka ah ee Xoghayaha Guud ee Qaramada Midoobay u qaabilsan Soomaaliya, James Swan, ayaa booqday Kismaayo si uu Axmed Madoobe ugu qanciyo dib ugu soo laabaashada shirka basle Axmed Madoobe wuu ka biya diiday.

16-kii October- Xafiiska Ra’iisul wasaaruhu waxay uu sheegay in shirka GWQ uu weli socdo iyada oo uusan Axmed Madoobe joogin Muqdisho.

27 October- Waxaa dib loo billaawday kulamdii shirka Golaha Wadatashiga Qaranka iyada oo aysan Jubaland qayb ka ahayn.

30 October- waxaa shirka olaha Wadatashiga Qaran laga soo saaray go’aan ah in sanandka 2025 si toos ah loosoo doorto dowladaha hoose iyo Madaxda Dowlad Goboleedyad

31- October- Jubaland ayaa ka hor timid go’aankaas waxayna caddeysay inay qabsan doonto doorasho u gaar ah oo dadban.

2dii bishaan November, Baarlamaanka Soomaaliya ayaa ogolaaday inu muddo bil dib loo dhigo fasaxa xildhibaanada si loo meelmariyo shuruucda doorashooyinka

3dii Bishan November- Waxaa is casilay Wasiiru Dowlihii wasaaradda Qorsheynta C/rashiid Jire iyo Axmed Cismaan Daqare oo ahaa Wasiir Kuxigeenka Waxbarashada. Labaduba waxay kasoo jeedaan Jubaland

Islama maalintaas, Madaxweynaha Jubaland Axmed Madoobe ayaa shir wadatashi isugu yeeray Xildhibaannada Labada Aqal ee Jubaland ku matala Baarlamaanka JFS

4tii bishaan November- Ra’iisul Wasaare Xamse Cabdi Barre ayaa wasiiradii is casilay ku bedelay Xildhibaan Axmednuur Sheekh Maxamed C/rashiid Maxamed Ducaale

Isla maalintaas, Dowlad Goboleedka Jubaland ayaa shaaca ka qaaday in dowladda federaalka ay usoo dirtay wafdi dhexdhexaadiyayaal ah oo ka yimid dhanka Kenya.

7dii bishaan November- Guddoonka labada Aqal ee Baarlamaanka ayaa magacaabay Guddi Kumeel gaar ah oo qaabilsan diyaarinta Xeerarka doorashooyinka iyo Xisbiyada.

9kii bishaan November- Jubaland ayaa magacawday guddiga doorashooyinka dadban, dowladda federaalka ayaa ka hortimid, waxayna ku tilmaamtay sharci darro.

10 ka bishaan November- Jubaland ayaa hakisay xiriirkii ay la leheed dowladda federaalka. Haddaba, Maxay kula tahay tillaabada xigi doonta?

Isha: Dawan

The post Yaa ku haray isbahaysigii dhaliyay isbedelkii uu kusoo baxay Xasan? appeared first on Caasimada Online.