Axmed Madoobe oo u jiheystay doorasho iyo 5 qodob culus oo kasoo baxay

[Deeq A.]

Kismaayo (Caasimada Online) – Maamulka Jubbaland ayaa soo saaray amaro culus oo uu ku sheegay “in lagu adkeynayo nabad-gelyada doorashooyinka soo socda” ee maamulkaasi.

Digniintan oo loo diray dhammaan ciidamada iyo daneeyayaasha siyaasadda gobolka, ayaa waxay kusoo baxday wasaaradda wasaaradda amniga Jubbaland, iyadoo uu ku saxiixnaa wasiir ku-xigeenka ahna ku-simaha wasiirka amniga maamulka, Gen. Aadan Axmed Xaaji.

Warqaddan oo ka kooban illaa 5 qodob ayaa lagu cadeeyay arrimaha loogu tala-galay sugidda amniga doorashada iyo xakameynta falalka amni-darrada.

Maamulka ayaa mamnuucay ilaalada gaarka ah ee musharaxiinta, iyadoo lala socod-siiyay dhamaan musharixiinta iyo daneeyayaasha ka qeyb-galaya doorashada maamulka Jubbaland in amaankooda ay sugayaan ciidanka booliska Jubbaland, sidaas darteedna ay la xiriiraan taliska ciidanka booliska maamulka, si loo siiyo ciidan sharci ah oo suga amaankooda, sida lagu yiri awaamiirta uu soo saaray maamulka Jubbaland.

Wasaaradda amniga ayaa sidoo kale mamnuucday in la abuuro ciidamo beeleedyo ama kooxo hubeysan oo khatar gelin kara amniga doorashada, si looga hortago isku dhac beeleed iyo khataraha kale ee nabadgelyo, iyadoo maamulka u digay cid kasta oo ka qeyb qaadata falal argagixiso ama amni-darro, kuna goodisay in tallaabo adag laga qaadi doono.

Halkan ka aqriso qodobada kasoo baxay maamulka Jubbaland;

Ayadoo lagu guda jiro u diyaar-garoowga qabsoomida doorashooyinka heerarka kale duwan ee dowlad-goboleedka Jubbaland ayaa waxaa la farayaa dhamaan ciidamada kala duwan ee Jubbaland qodobada hoos ku xusan;

Sidoo kale waxaa la wargelinayaa dhamaan Musharaxiinta iyo daneeyayaasha doorashooyinka dowladda Jubbaland;

1. Dhamaan ciidamada kala duwan ee Jubbaland waxaa la farayaa in ay galaan heegan buuxa oo lagu xaqiijinayo amniga dhamaan deegaanada Jubbaland.

Sidoo kale dhamaan ciidamada waxaa la farayaa in aysan ku milmin siyaasadda oo ay joogaan xerooyinkooda iyo goobahooda shaqo.

2. Waxaa mumnuuc ah askari hubeysan oo aan waajib shaqo ku jirin in lagu arko goob aan ahayn goobtiisa shaqo.

3. Dhamaan Musharixiinta iyo daneeyayaasha ka qeyb-galayo doorashada Jubbaland waxaa lagu wargelinayaa in amaankooda ay sugayaan ciidanka booliska Jubbaland, sidaasi darteed waa in ay la xiriiraan Taliska Ciidanka Booliska Jubbaland si loo siiyo ciidan sharci ah oo suga amaankooda.

4. Amaanka deegaanada Jubbaland waa mid la isku halleyn karo waxaana mamnuuc ah in la abuuro ciidamo beeleedyo u abaabulan qaab qabiil oo lagu qal-qal gelinaayo amaanka iyo nabadda ka jirta Jubbaland.

5. Ugu dambeyn cid kasta oo ka qeyb qaadata falal amni darro ama u hogaansami weyso qodabada kor ku xusan waxaa laga qaadi doonaa tallaabo sharciga waafaqsan.

The post Axmed Madoobe oo u jiheystay doorasho iyo 5 qodob culus oo kasoo baxay appeared first on Caasimada Online.