Xog: Toogashadii ay Maxkamadaha Muqdisho fuli jireen oo arrin yaab leh u joogsatay

[Deeq A.]

Muqdisho (Caasimada Online) – Waxaa joogsatay toogashadii ay fuli jireen maxkamadaha dalka, markii la xukumo dambiilaha, hal sabab darteed, waxaana arrintaan baaritaan ku sameysay Caasimada Online.

Dhowrkii bilood ee lasoo dhaafay waxaa joogsaday fulinta kiisaskii dilka ahaa ee maxkamadaha dalka ay ku fuliyeen dambiilayaasha lagu xukumo in la qosaaso, si looga oofiyo dunuubta ay galeen.

Ragga xabsiyada ku jira ee lagu xukumay in tiirka la geeyo, balse la waayey meel lagu toogto waxaa ka mid ah, Taliyihii Booliska Degmada Heliwaa Cabdifitaax Qoslaaye iyo Qoonr oo askartiisa ka tirsanaa oo qaab bahalnimo ah u dilay ganacsade Abuukar Kaabax oo ahaa wiil dhalinyaro ah oo nolol wanaagsan ku heystay Muqdisho.

Sidoo kale waxaa kamid ah Sayid-cali Macalin Daa’uud oo lagu helay inuu xaaskiisii gubay oo dilay iyo tobanaan Shabaab ah oo dad badan laayey, dilna lagu xukumay.

Sida ay ogaatay Caasimada Online, arrintaan waxaa sabab u ah in la waayey goob lagu toogto, laguna aaso, xugmanayaasha ku jira xabsiyada Muqdisho ee geystay dilalka iyo dunuubta bareerka ah.

Dowladda Soomaaliya ayaa la wareegtay dhulkii Iskuul Buluusiya ee xeebta degmada Xamarjajab, halkaas oo tiirka toogashada iyo qabuuraha lagu aaso meydadka ay ku yaaleen.

Dowladda ayaa derbi ku wareejisay dhulkaas, kana soo fogtay dadkii ku aasnaa, in kastoo aan dhulkaas weli laga faa’iideysan, hadana waxaa caqabad adag kala kulmay maxkamadaha dalka oo dembiilayaal badan ay xabsiyada ugu jiraan.

Saraakiil ka tirsan maxkamadaha dalka ayaa Caasimada Online u sheegay in ilaa madaxweyne Xasan Sheekh, maamulka gobolka Banaadir iyo hey’adaha kale ee dowladda ay kala hadleen, balse ilaa hadda aan la helin dhul u diyaarsan ama loo diyaariyey in lagu fuliyo xukunada dilka ah.

Maxkamadda Ciidamada ayaan ogaanay inay codsatay in la siiyo qeyb kamid ah fagaarihii toogashada ee dowladdu la wareegtay, balse waa laga diiday, waxaana la waayey dhul kale oo amaan ah oo lagu toogto dembiilayaasha, laguna aaso meydkooda.

Waxaa la go’aansaday in dambiilayaasha xabsiyada lagu sii hayo ilaa inta laga helayo goob munaasab ah oo lagu toogto, taasina waa khatar kale, maadaama xubnaha qaar ay suurtagal tahay inay xabsiyada ka baxsadaan ama dad kale dilaan oo dagaalamaan, sida marar horaba dhacday.

The post Xog: Toogashadii ay Maxkamadaha Muqdisho fuli jireen oo arrin yaab leh u joogsatay appeared first on Caasimada Online.