Bulshada rayidka ah oo war culus kasoo saaray khilaafka ka jira DALKA

[Deeq A.]

Muqdisho (Caasimada Online) – Guddoomiyaha ururka bulshada rayidka Soomaaliyeed  Cismaan Muxidiin Shaatax oo shir jaraa’id ku qabtay Muqdisho ayaa ka hadlay xaaladda siyaasadeed ee dalka, wuxuuna caddeeyay mowqifkooda ku aadan khilaafka taagan.

Shaatax ayaa wax laga xumaado ku tilmaamay kala fogaashaha maxda dalka iyo siyaasiyiinta oo isku qabto arrimo la xiriira sida loo wajahayo doorashooyinka dalka.

“Daladda bulshada rayidka Soomaaliyeed waxay aad uga xun tahay qoraallada kala duwan ee kasoo baxay madaxda dalka heer federaal iyo heer dowlad goboleed, taas oo muujineyso khilaafka siyaasadeed ee ka jira dalka in aan weli xal loo helin” ayuu yiri.

Guddoomiyaha ururka bulshada rayidka Soomaaliyeed ayaa sidoo kale ka horyimid go’aannadii kasoo baxay shirka golaha wadatashiga qaranka, wuxuuna tilmaamay in dalka ay geliyeen kala qaybsanaan aad u baahsan.

Sidoo kale wuxuu ku eedeeyay in xubnaha golaha wadatashiga qaranka ay isku soo koobeen talada, taasina ay uga sii dartay xaaladda cakiran ee uu ku jiro dalka.

“Bulshada rayidka ah waxa ay aaminsan tahay in khilaafyada siyaasadeed ee soo noq-noqday inay salka ku hayaan talada oo ay isku koobeen golaha wadatashiga qaranka” ayuu raaciyay.

Waxaa kale oo uu kaa digay sii socoshada khilaafkan oo uu tilmaamay inuu saameyn ku yeelan karo geeddi socodka dowlad dhiska Soomaaliya iyo horumarka dalka.

Ugu dambeyn wuxuu ku baaqay in la ballaariyo la tashiyada lagana qayb-galiyo maamullada maqan, siyaasiyiinta iyo bulshada rayidka qaybaheeda kala duwan.

The post Bulshada rayidka ah oo war culus kasoo saaray khilaafka ka jira DALKA appeared first on Caasimada Online.