Maxaa la filayaa in xubnaha BF ay qabtaan muddada bisha ee dib loo dhigay fasaxooda?

[Deeq A.]

Muqdisho (Caasimada Online) – Madaxweynaha Soomaaliya ayaa maanta xildhbaanada labada aqal ka codsaday inay bishaan ka shaqeeyaan howlaha hortabinta u leh shuruucda doorashooyinka qof iyo codka ah ee la rabo in dalka ay ka qabsoonto.

Xildhibanada ayaa sidoo lale laga dalbaday inay dhammeystiraan qorshooyin ay soo ansixiyeen golaha wasiirada, kuwaas oo la arabay inay meel mariyaan baarlamaanka.

Dhanka kale xildhibaanada ayaa bishaan ka shaqeyn doona meel marinta war murtiyeedkii ka soo baxay shirka madasha wadatashiga qaran oo ay yeesheen dowladda iyo maamul goboleedyada qaar, inkasta oo ay ka maqnaayeen labada maamul ee Puntland iyo Jubaland.

Aragtida xildhibaanada aqlabay codsiga madaxweynaha

Xildhibaan Mohamud Abdirahman Beenebeene ayaa sheegay in kalfadhiga lagu jiray ee baarlamaanka uu xirmayay asbuuca koowaad ee bishaan November, ayna jireen shuruuc badan oo ay soo ansixiyeen golaha wasiirada kuwaas oo laga rabay in xildhibaanada ay aqriyaan oo ay ansixiyaan, balse laga gaari waayay.

Waxa uu intaa hadalka ku daray in xirnaashaha kala fadhiga la gaaray balse loo baahday in muddo lagu daro si howsha taala loo dhameystiro.

“Maadaama uu kalafadhiga xirmaayo ayuu madaxweynuhu codsaday in bil lagu daro si loo dhameystiro shuruucdaan muhiimka ah,” ayuu yiri wasiir Beenebeene.

Aragtida xildhibaanada diiday codsiga madaxweynaha

Xildhibaan Daahir Amiin Jeesow oo kamid ah mudanayaashii maanta xaadiray kulanka labada gole ee baarlamaanka ayaa BBC-da u sheegay in sharciga uusan dhigayn in baarlamaanka fasixiisa hal bil dib loo dhigo.

“Qodobka 66 ee dastuurka waxa uu leeyahay baarlamaanka waxa uu yeelanayaa sanadkii laba kala, oo midkiiba uu yahay afar bilood, kadib laba bilood oo fasax ah,” ayuu yiri xildhibaan Jeesow.

Waxaa kale oo uu ka dhawaajiyay sababta uu madaxweynaha u dalbaday in baarlamaanka ay shaqeeyaan in aysan sharci ahayn sida ay isaga ula muuqato.

“Ujeedada fasaxa waa in madaxweynaha uu keeno shuruucda doorashooyinka, taasna badalkeeda xeer hoosaadka baarlamaanka golaha shacabka qodobka 71- waxa uu leeyahay labada bilood ee ugu horreysa kala fadhi walba ayaa sharci loo gudbin karaa xildhibaanada, haddii muddadaas la dhaafana wax sharci ah oo la soo gudbin karo malahan,” ayuu yiri xildhibaan Daahir Amiin.

Ugu dambeyn wuxuu tilmaamay in xittaa haddii muddada bisha ah ee uu madaxweynaha dalbaday la siiyo aan la ansixin karin qodobo uu haatan soo gudbiyo.

Isha: BBC

The post Maxaa la filayaa in xubnaha BF ay qabtaan muddada bisha ee dib loo dhigay fasaxooda? appeared first on Caasimada Online.