ABIY Axmed oo ku dhowaaqay arrin uga sii dareysa xiisada badda

[Deeq A.]

Addis Ababa (Caasimada Online) – Ra’iisul Wasaaraha Ethiopia Abiy Axmed ayaa sheegay in aysan ku dooneyn helista galaanka badda cas ah xoog iyo weerar, balse ay is-difaaci doonto, haddii weerar arrintan la xiriira lagu soo qaado, sida uu hadalka u dhigay.

Bishii Janaayo ee bilowgii sanadkan ayaa Ethiopia waxay heshiis la gashay maamulka Somaliland, kaasi oo ka kireynaya Ethiopia 20km oo dhul xeebeedkeeda badda cas ah muddo 50 sano ah, taas bedelkeedana ay Somaliland Ethiopia ka helayso aqoonsi.

Abiy Axmed oo maanta la hadlayay baarlamaanka dalkaas ayaa helista heshiiskan ku tilmaamay mid “horumarineed,” ah oo ku salaysan baahida ay Ethiopia u qabto marin badeedka.

“Waxaan dalbanay in badda gaarno, taasina kuma raadin doonno weerar iyo dagaal, laakiin si hufan ayaan isaga difaaci doonnaa haddii ay wax dhacaan,” ayuu yiri Abi Axmed.

Abi Axmed waxa uu sheegay inuu ku rajo weyn yahay in himilladaasi ay Ethiopia gaarto, haddii hadda aanay gaarinna, buu yiri “ay caruurtoodu gaari doonto.”

Heshiiskaasi waxa uu ka careysiiyay dowladda Soomaaliya oo ku tilmaantay mid sharci darro ah, oo meel ka dhacna ku ah qarannimadeeda iyo madax-banaanideeda dhuleed.

Waxay erisay safiirkii Itoobiya bishii April, Talaadadiina waxay ku amartay Ali Mohamed Adan, oo ka tirsanaa qunsuliyadda Ethiopia ee Muqdisho inuu dalka ka baxo.

Soomaaliya waxaa kale oo ay horey u sheegtay in ciidamada Ethiopia aysan qeyb ka noqon doonin howl-galka cusub ee nabad Ilaalinta Midowga Africa ee bedelaya ATMIS.

The post ABIY Axmed oo ku dhowaaqay arrin uga sii dareysa xiisada badda appeared first on Caasimada Online.